Hunyo 28 gideklarar sa Malakanyang

isip nat’l holiday sa pagsaulog sa Eid’l Adha

TAGBILARAN CITY, Bohol, June 19 (PIA)--Gi-anunsyo sa Malakanyang niadtong Miyerkules nga ang Hunyo 28 usa ka national holiday subay sa kasaulogan sa Eid’l Adha o Feast of Sacrifice.

Ang Proclamation No. 258, pinetsahan og Hunyo 13, 2023 ug gilagdaan ni Executive Secretary Lucas Bersamin, miingon nga ang Eid'l Adha usa sa pinakadakong kapistahan sa Islam nga gisaulog sa tibuok kalibutan.

“Following the 1444 Hijrah Islamic Lunar Calendar, the National Commission on Muslim Filipinos has recommended that 28 June 2023, Wednesday, be declared a national holiday, in observance of Eid’l Adha (Pagsunod sa 1444 Hijrah Islamic Lunar Calendar, ang National Commission on Muslim Filipinos nirekomendar nga ang Hunyo 28, 2023, Miyerkules, ideklarar nga national holiday, isip pag-obserbar sa Eid’l Adha),” dugang sa proklamasyon.

Ang Republic Act No. 9849 nagdeklarar nga ang ikanapulo nga adlaw sa Zhul Hijja, ang ikanapulo ug duha ka bulan sa Islamic Calendar, usa ka nasudnong holiday alang sa pag-obserbar sa Eidul Adha (Eid'l Adha), nga adunay mabalhin nga petsa.

Ang Eid'l Adha mao ang ikaduha sa duha ka nag-unang holidays nga gisaulog sa Islam sa tibuok kalibutan.

Sa komunidad sa mga Muslim, parte sa karne ang gikaon sa pamilya nga naghimo sa sakripisyo sa usa ka hayop, samtang ang nahabilin nga karne giapod-apod sa mga kabus ug nanginahanglan. Busa, ang kalihokan gi-isip nga usa ka pista sa pagpaambit.

Sama sa Eid'l Fitr, kini gipalahi sa komunal nga pag-ampo sa kadlawon sa unang adlaw niini. (ecb/PIA7-Bohol)

Gideklarar pinaagi sa Proclamation No. 258 ang Hunyo 28, 2023 isip national holiday sa tibuok nasud subay sa kasaulogan sa Eid’l Adha o Feast of Sacrifice. (PIA)