Kaswal nga empleyado sa 14 LGUS

State university, gipasakop sa SSS

TAGBILARAN CITY, Bohol, June 14, (PIA)—Napulo ug upat na ka kalungsuran, usa ka barangay ug upat ka state universities ang kang kinsa nga mga empleyado wala mapasulod sa Government Service Insurance System (GSIS) ang mahimong kampante na sa ilang pagpanarbaho bisan pa og kaswal o kontraktuwal lamang.

Kini kay nakasabut ang ilang mga labaw, nga dili igo ang ilang ikahatag nga hinabang ngadto sa empleyado sa higayon nga madisgrasya o masakit samtang anaa sa trabaho o sa adlaw nga tingtrabaho.

Tig-a uy walay kasingkasing ang mga opisyal, kon may trabahante sila nga maoy gisaligan sa pamilya nga mahimutang sa alanganin, ug walay ika-amot sa pagpatambal, o paghupay sa kahingawa sa banay nga mawad-an og pamugas, apan baya, mahimong gaan lanag kanila ang pagpasulod sa trabahante, sa seguridad, pasabut ni Engr Alieta Basubas, hepe sa Social Security System sa Bohol.

Kining mga trabahante nga kasagaran maoy nagbuhat sa mga bug-at ug dili kaayo gipili nga trabaho apan nagpahanoy sa dagan sa serbisyo sa lungsod, kasagaran, mapasagdan nga walay mahikap nga tabang sa higayon nga mahimutang sa alanganin.

Nailhan nga mga kaswal ug kontraktuwal dala sa job-order nga pagkasulod sa trabaho, kini sila dili mahimo nga isulod sa GSIS, o insurance sa mga regular nga trabahante sa goberno tungod sa matang sa ilang pagkatrabahante.

Apan, may opsyon nga gitanyag ang SSS: ipa-enrol ang mga kaswal ug kontraktuwal nga trabahante sa SSS isip self-employed, ug mopirma ang LGU nga sila na ang mahimo nga kaabag sa SSS sa pagkaltas sa sweldohan sa matag buwan agi og tampohon sa SSS ilawom sa programang KaltaSSS-Kolek Program sa SSS.

Sa gamay nga binuwan nga tigum sa empleyado, makakuha na siya og benepisyo sa SSS sama sa regular nga sakop, dason ni Engr. Basubas.

Isip membro na sa SSS, ang self employed, makadawat og hinabang kon masakit, manganak, moretiro sa trabaho, kon maangol, abag sa haya kon madisgrasya ug walay swerte ug hinabang alang sa mga nahibilin nga banay.

Gawas niana, mahimo usab sila nga mogamit sa programa sa pahuwam sa ilang gitagak nga binuwan nga tigum, huwam aron magamit pagpahiuli sa kinabuhi human sa katalagman, ug huwam alang sa abag sa pag-eskwela, dugang pasabut sa SSS.

Matud pa, may mga LGU nga naghunahuna pa sa ilang palisiya kabahin niini, ilabi na kay, matud nila, may nahilambigit nga kwarta.

Apan, segun sa SSS, ang kwarta nga mahi-apil, kadto na nga iyaha sa empleyado nga gipamembro.

Matud pa usab, may nga empleyado sa Buhatan sa Mamahandi sa lungsod ang mi-angal kay may madugang sa ilang trabaho, apan daghan usab ang natingala ngano nga abtik kini mopahiluna sa kaltas sa mga empleyado sa mga nagpalending ug mga pahuwam sa mga pribado nga kompanya.

May LGUs usab nga mihangyo una sa SSS nga tun-an pa ang pamaagi ug ipalili una sa ilang mga abogado ang lagdaan nga MOA sa programa.

Hinuon, ang Government corporate counsel sa Pilipinas una na nga milili sa MOA ug mideklara nga kini walay trampas ug maayo nga serbisyo sa mga trabahante nga walay social security. (PIABohol)