Awhag sa DSWD 4Ps NPM director:

Gamita og sakto ang 4Ps grants sa edukasyon, nutrisyon

TAGBILARAN CITY, Bohol (PIA)--Gipahinumdoman sa Department of Social Welfare and Development (DSWD) ang mga benepisyaryo sa Pantawid Pamilyang Pilipino Program (4Ps) nga gamiton sa husto ug subay sa katuyoan niini ang cash grants nga nadawat.

“I hope sa ating 4Ps beneficiaries, take care of the grants. ‘Yan ang lagi kong sinasabi, na gamitin sa tama dahil ito ay makatutulong para mas mapaganda pa ang buhay ninyo eventually kapag nakapag-aral na ang mga anak ninyo at kung sila ay malusog,” matud pa ni 4Ps National Program Manager Director Gemma Gabuya, sa second episode sa 4Ps Fastbreak niadtong Setyembre 18.

Ang 4Ps Fastbreak, pinakabag-o nga programa sa DSWD Strategic Communications (StratComm) Group ug gidumala ang maong programa ni Venus Balito sa Digital Media Service ug mahimong matan-aw live sa DSWD FB page matag adlaw nga Miyerkules.

Tuyo niining programa nga mahatagan og impormasyon ug kahibalo kalabot sa nasudnong programa sa ahensya sa pagwagtang sa kakabos.

Matud pa ni Director Gabuya, ang 4Ps naghatag og conditional cash transfer sa mga kabus nga pamilya aron maatiman ang panglawas, nutrisyon, ug edukasyon sa ilang mga anak.

Gipasabot sa 4Ps director nga alang sa edukasyon– sa mga estudyante sa elementarya, P300 matag bata matag buwan sulod sa 10 ka buwan; kun high school, P500; ug senior high school P700.

Ang 4Ps program naghatag usab ug binuwan nga rice subsidy nga P600 ug P750 nga health grants sa matag benepisyaryo nga pamilya sa programa.

Giklaro ni Gabuya nga tulo ra ka mga bata nga gimonitor matag panimalay ang mahimong maapil sa 4Ps program. Ug ang matag pamilya nga miyembro sa programa awtomatik nga maapil sa National Health Insurance Program o PhilHealth.

Mahimo usab sila maka-avail sa Sustainable Livelihood Program (SLP) sa ahensya o uban pang mga programa niini ingon man ang mga programa nga gitanyag sa mga akreditado nga pribadong institusyon.

Naghatag kini og suporta sa mga pamilyang nanginahanglan aron makasagubang sa kalisdanan sa kinabuhi.

Sa pagkakaron, ang programa sa 4Ps adunay halos 4.4 ka milyon nga mga benepisyaryo sa panimalay sa tibuok nasud. (ecb/PIA7-Bohol)

Ang 4Ps usa ka national poverty reduction strategy sa gobyerno nga gipatuman base sa Republic Act No. 11310 o “An Act Institutionalizing Pantawid Pamilyang Pilipino Program (4Ps)” ug gilagdaan niadtong Abril 17, 2019. (ecb/PIA7-Bohol)