DSWD-7 mi-awhag sa mga benepisyaryo sa 4Ps

sa pag-update sa profile sa ilang mga panimalay

TAGBILARAN CITY, Bohol (PIA)--Ang Department of Social Welfare and Development Field Office 7—Central Visayas nag-awhag sa mga active household beneficiaries nga adunay mabdos nga mga miyembro o mga bata nga nag-edad og 0 ngadto sa 2 ubos sa Pantawid Pamilyang Pilipino Program (4Ps) sa pag-update sa ilang household profile.

Ang pag-update sa ilang profile sa panimalay isip pagpangandam sa paglusad sa First 1000 Days (F1KD) conditional cash grant nga magsugod sa 2025.

Ang mga benepisyaryo sa panimalay sa 4Ps gi-awhag sa pag-update sa ilang impormasyon ug mga detalye sa pagkontak pinaagi sa ilang 4Ps city/municipal links (C/MLs) nga nadestino sa ilang tagsa-tagsa ka lugar pinaagi sa pagpil-ap sa Beneficiary Updating System (BUS) Form 5.

Matud pa ni DSWD-7 Regional Director Shalaine Marie Lucero, ang pag-update sa mga profile sa panimalay importante aron maseguro nga masakop nila ang tanang aktibong 4Ps household beneficiaries nga adunay mabdos nga mga miyembro ug adunay mga anak nga dili molapas sa dos anyos alang sa pagpatuman sa First 1000 Days, o F1KD, sunod tuig.

Gawas sa pag-fill-up sa BUS Form 5, ang target sa 4Ps household beneficiaries kinahanglan nga mosumiter og documentary requirements, lakip na ang birth certificate o local civil registry sa bata ug ang medical certificate o health certificate sa mabdos nga miyembro nga gi-issue sa ilang tagsa-tagsa ka Rural Health. Unit (RHU) o Barangay Health Station (BHS).

Ang mga benepisyaryo sa 4Ps gi-awhag sa pagbisita sa ilang C/MLs sa dili pa ang Oktubre 20, 2024.

Kini nga paningkamot nangandam alang sa F1KD nga implementasyon sa grant sa Enero 2025, nga naghatag og gigahin nga pondo pinaagi sa usa ka espesyal nga probisyon sa General Appropriations Act (GAA).

Gisugyot ni DSWD Kalihim Rex Gatchalian ngadto kang Presidente Ferdinand R. Marcos, Jr. ang F1KD conditional cash grant isip dugang pinansyal nga suporta ubos sa 4Ps. Kini nagtumong sa pagtabang sa mga panimalay sa panahon sa kritikal nga unang 1,000 ka adlaw sa paglambo sa bata.

Ang conditional grant nagtinguha sa pagsulbad sa mahinungdanong mga kal-ang sa panglawas sa inahan ug bata, sama sa dili igo nga pag-atiman sa prenatal ug mga kakulangan sa nutrisyon, nga mahimong mosangpot sa pagkahinay sa pagtubo ug paglangan sa paglambo sa mga bata.

Ang 4Ps, nga gilusad niadtong 2008 ug na-institutionalize niadtong 2019 pinaagi sa Republic Act No. 11310 o ang 4Ps Act, naghatag og subsidyo sa giila nga mga kabus nga panimalay kansang mga anak nakadawat og education grants aron makatapos sa elementarya ug senior high school, health grants, ug rice subsidies. (ecb/PIA7-Bohol)

Ang 4Ps grantee gikan sa lungsod sa Sagbayan, Bohol mibisita sa opisina sa 4Ps aron i-update ang profile sa panimalay sa ilang pamilya. (DSWD-7 photo)