Lactation station sa Kapitolyo giila isip

‘Mother-Friendly Workplace’ sa DOH

TAGBILARAN CITY, Bohol (PIA)--Ang Lactation Station sa Kapitolyo nakadawat og sertipikasyon gikan sa Department of Health (DOH) Rehiyon 7 nga nag-ila isip ‘Mother-Friendly Workplace.’

Kini nagtakda og bag-ong sumbanan sa Panggamhanan sa lalawigan sa Bohol alang sa pagka-inclusivity, nga nakaangkon sa maong prestihiyosong Mother-Friendly Workplace Certification gikan sa DOH, mipasalig sa pagsuporta sa mga inahan nga nagtrabaho.

Ang sertipiko gi-isyu niadtong Septiyembre 11 ug gilagdaan ni Regional Director Dr. Jaime Bernadas, nga adunay duha ka tuig nga balido, ug ipailalom sa re-application ug reassessment.

Kining mahinungdanon nga kalampusan nagtimaan sa ikatulo nga non-health facility sa Bohol nga nakadawat og pag-ila alang sa mga lawak sa pagpasuso niini nga ma-akses sa una ug nag-inusara sa Pilipinas nga UNESCO Global Geopark ug Regenerative Province.

Niadtong Setyembre sa niaging tuig, gibuksan sa Kapitolyo ang Lactation Station, nga nahimutang kilid sa Provincial Health Office, nga gitumong sa paghatod sa inclusive ug accessible nga serbisyo sa panglawas nga giuna sa Strategic Change Agenda ni Gob. Erico Aristotle Aumentado.

Dugang pa niini, ang pag-ila nagsugod sa Bohol-Panglao International Airport, diin nakakuha og sertipikasyon niadtong Abril 11 ning tuiga sa ilang breastfeeding station.

Ang munisipyo usab sa Loboc nahimong unang local government unit sa Bohol nga gihatagan sa sertipikasyon nga gi-isyu niadtong Marso 15, uban ang ilang Breastfeeding Station sa Heritage Building sa Loboc Tourism Complex.

Kini nga pag-ila subay sa Republic Act No. 10028, nailhan nga Expanded Breastfeeding Promotion Act, nga nagmando sa tanang publiko ug pribadong institusyon sa pagtukod og lactation stations. (ecb/PIA7-Bohol)

Ang Lactation Station sa Kapitolyo nga nahimutang kilid sa Provincial Health Office gibuksan sa pagpanguna ni Gob. Erico Aristotle Aumentado niadtong Setyembre sa niaging tuig. (PiMO photo)