FITS achievers, gipasidunggan sa ATI-7

TAGBILARAN CITY, Bohol (PIA)--Gipasidunggan sa Agricultural Training Institute Central Visayas (ATI-7) ang ilang 6 ka Farmers Information Technology Services (FITS) isip mga Achiever Awardees 2024.

Ang FITS Guihulngan City sa Negros Oriental ang nakasakmit sa Best FITS Center Implementer, Most Innovative FITS Center ug Highest Number of KP Dissemination.

Ang FITS Bindoy sa Negros Oriental ang nakakuha sa Most Improved FITS Center ug Highest Number of KP Developed, samtang ang FITS San Francisco sa lalawigan sa Cebu ang nakakuha sa Highest Number of Reports Submitted.

Gipasidunggan usab ang FITS Bayawan City ug Valencia sa Negros Oriental ug FITS Tubigon sa lalawigan sa Bohol isip mga runners-up.

Ang awarding gipahigayon atol sa ika-38 nga kasaulogan sa ATI Founding Anniversary nga gipahigayon sa ATI RTC VII sa syudad sa Tagbilaran niadtong Pebrero 14, 2025.

Alang sa tuig 2024, adunay mga FITS centers nga aktibong nagpatuman sa nagkalain-laing programa aron mapauswag ang kalamboan sa agrikultura, pagbalhin sa teknolohiya, ug paghatag-gahum sa mga angayang mag-uuma.

Busa, ang ATI Central Visayas pinaagi sa FITS program niini nagpasiugda niini nga pasidungog sa pagbuhat sa FITS Center ug staff alang sa ilang talagsaong performance ug kontribusyon.

Isip pag-ila sa ilang maayong kontribusyon, ang 6 ka major awardees nakadawat og mga plake ug ICT nga mga kagamitan isip mga ganti, ingon man sa mga runner-up.

Si ATI-7 Center Director Gracia F. Arado ang nangulo sa awarding kauban si IS Chief Merrian P. Soliva ug FITS Focal Person Doris Isabel J. Racho.

Mitambong sa pagdawat sa ilang mga pasidungog sila Guihulngan City FITS Manager Allimar Amaat uban sa ISS Klenton Gamao, Bindoy FITS ISS Alijah Gabriel Palumar, ug San Francisco FITS ISS Johnray Jaron. (ecb/PIA7-Bohol)

Ang paghatag og awards sa ATI-7 sa FITS Achievers Awards 2024 atol sa ika-38 nga kasaulogan sa ATI Founding Anniversary niadtong Pebrero 14, 2024 nga gipahigayon sa ATI RTC-VII, sa syudad sa Tagbilaran. (hulagway sa ATI-7)