Agri engineers nagpahigayon og acceptance

testing sa mga pasilidad, makinarya sa agrikultura

TAGBILARAN CITY, Bohol (PIA)--Ang mga inhenyero sa agrikultura sa Department of Agriculture-Central Visayas (DA7) Regional Agricultural Engineering Division (RAED) nipahigayon og acceptance testing sa nagkadaiyang corn post-harvest facility ug makinarya nga nagkantidad og P12.5 milyones, nga gipahigayon sa lungsod sa Ubay ning bag-o lang.

Gipundohan ubos sa programa sa mais sa DA7, kini nga mga makinarya nga naglakip sa combine harvester nga nagkantidad og P2,500,000.00, hauling truck nga nagkantidad og P3,000,000.00, recirculating dryer P3,500,000.00, ug building nga nagkantidad og P3,500,000.000.00 o may kinatibuk-ang P12.5-million gipaubos sa acceptance testing, sa dili pa iapod-apod ngadto sa Ubay Carp Beneficiaries Credit Cooperative (UCBCC), ang benepisyaryo sa programa.

Ang UCBCC usa ka asosasyon sa mga mag-uuma sa mais ug organisasyon sa cluster ubos sa Farm and Fisheries Consolidation and Clustering (F2C2).

Ang pagsulay sa mga makinarya usa ka sumbanan nga protocol nga sundon aron masiguro ang pag-andar ug kaepektibo sa mga pasilidad ug makinarya nga gihatud sa mga supplier, kung nakab-ot niini ang mga detalye ug sumbanan sa departamento sa wala pa ipang-apod-apod sa gituyo nga mga benepisyaryo.

Si Leonardo C. Cutillas Sr., ang chairperson sa UCBCC, nagpahayag sa iyang pasalamat sa DA alang sa mga interbensyon, tungod kay makatabang kini nga maminusan ang oras ug gasto sa pagtrabaho sa panahon sa pag-ani.

“Among dakong pasalamat sa DA7 sa paghatag kanamo og mga seeds nga among gigamit sa among pagpananom, ug uban pa sama sa harvester nga adunay tulo ka gimbuhaton - ang pagsanggi, pagpakpak, ug paglubo. Sauna, mano-manuhon pa, taas kaayo ang proseso, lahi na karon nga ang pag-harvest diritso na lubo,” matud pa ni Cutillas.

Gidugang pa niini nga ang hauling truck dako og tabang sa paghakot sa mga inani nga mais, samtang ang circulating dryer makapamenos sa oras sa pagpauga—gikan sa 3-4 ka adlaw sa pagpauga ngadto sa pipila lang ka oras.

Kini nga mga pasilidad ug makinarya nagtumong sa pagpalambo sa kaepektibo sa mga operasyon human sa pag-ani ug pagsuporta sa malungtarong pag-uma sa mais. (ecb/PIA7-Bohol)

Ang pipila sa mga makinarya nga may kinatibuk-ang kantidad nga P12.5-million nga gipaubos sa acceptance testing sa dili pa iapod-apod ngadto sa Ubay Carp Beneficiaries Credit Cooperative (UCBCC), ang benepisyaryo sa programa. (DA-7 photo)