Alang sa Women’s Month

PSA workers gibansay sa

TESDA pagluto’g cookies

TAGBILARAN CITY, Bohol, March 15 (PIA)—Kapin sa 30 ka mga empleyado ug job order nga trabahante sa Philippine Statistics Authority (PSA) sa Bohol ang nabansay sa paghimo og cookies, agi og paghatag og dugang katakus, agi og tampo sa pagpalingkawas sa kababayen-an sa financial incapacity, sa Buwan sa kababayen-an.

Matud ni PSA Bohol Administrative Officer Mary Antonette Jungao, sa Women’s Month, ilang nahukman nga maghatag og dugang pagbansay aron magamhan pa ang kababayen-an lakip na usab ang kalalakinhan, sa pagluto og cookies nga mahimong sawhan sa pamilya o ikapamaligya isip dugang kita.

SI PSA Bohol Provincial Statistician Jesamyne Anne Alcazaren, midugang nga sa Women’s Month, daghang kalihukan ang gihan-ay sa ilang buhatan, nga kasagaran ang mga empleyado kababayen-an.

Malipayon ang PSA nga bisan sa gagmay nga mga katakus, makabaton og bag-o nga kahibawo ang atong mga empleyado, para kapilian alang sa dugang kita sa panahon nga wala sila sa oras ting-trabaho, saysay ni Alcazaren.

GIpahigayon sa pagpakigtambayayong sa Technical Education ang Skills Development Authority (TESDA), mismo ang mga baker sa TESDA Bilar ang nagbitbit sa ilang oven ngadto sa Galeria Luisa Activity Center, alang sa tunga sa adlaw nga bansaybansay.

Kami sa TESDA, dili makabalibad sa ingon niining mga mga hangyo, gani amo nga gipili nga ubanan ang PSA bisan kon may mga kalihukan usab ang TESDA aron ika-paambit ang kasayuran.

Gawas sa pagluto og cookies, mahimo usab sa TESDA ang pagbansay alang sa pagluto og cakes, gani ila na usab nga gipaabut ang bansay sa electrical house wiring, electronics ug mga skills nga kanhi, gipili sa mga kalalakinhan, matud ni Efrelyn Lapitan, TESDA trainor.

Sa mga grupo nga interesado nga makakuha sa susamang mga training, mosuwat o mobisita lamang sa TESDA Bohol, aron makigsabut sa mga detalye sa bansaybansay, dugang ni Lapitan. (PIABOhol)