‘Bohol Light’ office temporaryo nga

buksan sa daan’g Holy Spirit School

TAGBILARAN CITY, Bohol, March 13 (PIA)—Alang sa mga may personal nga transaksyon ngadto sa Bohol Light, ang kompanya mipahibalo nga temporary usa nilang sirad-an ang ilang buhatan sa dalan Enerio St, duol sa Land Transportation Office, aron masugdan na ang bag-o niining mas hamugaway nga buhatan.

Sala niini, samtang nagpaabut nga mahuman ang ilang buhatan didto, sugod Marso 17, ang Bohol Light temporary nga maghimo sa ilang base didto sa Ground Floor isip Tenant 1 sa Building A, Centrio de San Jose Business Center, o sa daan nga Holy Spirit School Complex, sa eskina Borja ug Remolador St.

Dugang niini, miaghat na usab ang Bohol Light ngadto sa ilang mga konsumidor nga mobayad nga gamiton ang online payment facility sa nahisgutang kompanya, aron wala nay panginahanglan pa nga pisikal nga moadto sa buhatan aron malikayan ang kahasol.

Alang niini, ang Bohol Light aduna nay mga online payment partners nga pwede modawat sa mga bayad, aron mahimo na kini dayon nga mabayran, bisan pa kon anaa lamang ang mobayad, sa balay.

Nunot usab niini, nanghangyoa ang kompanya sa dyutay nga pagsabut, kay samtang magtukod na og bag-ong buhatan, paningkamotan usab sa kompanya nga kaabagan kini og mas nindot pa nga serbisyo.

Alang sa dugang kasayuran, pwede nga makisayud pinaagi sa pagtawas sa Consumer Service Hotline nga (038) 427-2372 ug sa 0920-960-2372. (PIABohol)