Retraining sa mga LTO enforcers gimando

human sa viral nga insidente sa Bohol

TAGBILARAN CITY, Bohol (PIA)--Si Land Transportation Office (LTO) Chief, Assistant Secretary Vigor Mendoza II nimando niadtong Sabado sa pagpahigayon og refresher courses alang sa tanang enforcer sa ahensya sa tibuok nasud nunot sa viral nga insidente sa Bohol.

Sa viral video, nakita ang giingong pag-manhandling sa lima ka LTO enforcers sa usa ka motorista kinsa giingong nakuhaan og kutsilyo atol sa pagpahigayon nila og operasyon sa lungsod sa Panglao niadtong Pebrero 28.

Matud pa ni Mendoza nga ang maong insidente nanawagan og mas lawom ug sistematikong pamaagi aron masiguro nga dili na kini mahitabo sa umaabot.

Gidugang pa niini nga iya nang gimanduan ang hepe ug personnel sa LTO-Law Enforcement Service (LES) sa Central Office sa paghimo og updated version sa protocol nga angay sundon sa pagpatuman sa traffic rules and regulations.

Ang retraining program, matud ni Asec Mendoza, magtutok sa pag-obserbar sa tawhanong katungod ug saktong pamaagi sa pagpatuman sa tanang road safety regulations.

Niadtong Marso 1, gipadala ni Department of Transportation (DOTr) Kalihim Vince Dizon sa lalawigan sa Bohol si DOTr Assistant Secretary Jojo Reyes aron mag-imbestiga sa nahitabo ug gibisita usab niini ang motorista nga na-admit sa hospital human sa insidente sa Panglao.

Sa usa ka press conference sa kaulohan adlaw’ng Lunes, gi-anunsyo sa DOTr nga gitaktak na sa serbisyo ang lima ka mga traffic enforcer sa LTO nga nalambigit sa viral nga insidente.

“I would like to announce on behalf of the DOTr and LTO, we are, effective today, dismissing the law enforcers involved in the incident in Panglao, Bohol. They are hereby dismissed immediately,” matud pa ni Dizon.

“Di po ma-justify sa nakita nating dahas na ipinakita sa ating law enforcers," dugang pa ni Dizon. (ecb/PIA7-Bohol)

Ang mando ni LTO Chief, Assistant Secretary Vigor Mendoza II naggumikan sa nag-viral nga video sa giingong pag-manhandling sa lima ka LTO enforcer sa usa ka motorcycle rider kinsa giingong nakuhaan og kutsilyo atol sa pagpahigayon nila og operasyon sa lungsod sa Panglao niadtong Pebrero 28. (LTO/PIA)