Tigumanan sa Renewable

Energy mobarug sa Ubay

TAGBILARAN CTY, Bohol, March 11 (PIA)—Gilagdaan na tali nila ni Gobernador Erico Aristotle Aumentado sa ngalan sa lalawigan sa Bohol ug sa San Miguel Global Power Inc., ang katukoran sa 20 mega watts Battery Energy Storage System (BESS) nga kalakip sa Integrated Renewable Power Facility Hub, didto sa Imelda Ubay.

Ang pasilidad, mogamit sa teknolohiya sa baterya aron tigumon ang mga ma-ani nga koryente gikan sa mga renewable sources dinhi sa Bohol aron usab ikapasa sa industry markets alang sa mas stable nga power o ikapakatay sa mga local nga kutay sa sugang dagitab, kon gikinahanglan.

Ang BESS, mao nay modawat sa mga koryente nga maani sa mga solar, wind, hydro, tidal ug waste energy nga magenerate sa mga mamuhunan niini dinhi.

Segun sa ordianansa sa Bohol Renewable Energy nga napasa na sa Bohol, adunay makobra nga bahin sa Bohol sa matag energy nga magenerate dinhi ug ipasa ngadto sa mga grids pinaagi sa industry markets subay usab sa mga panginahanglan.

“Atua nang gipahigayon ang pagpirmahanay sa Memorandum of Agreement uban sa San Miguel Global Power (SMGP) Inc., kabahin sa 20-MW Battery Energy Storage System (BESS), nga ilang gitanyag; diin gipahiluna sa SMGP ang usa ka Integrated Renewable Power Facility Hub didto sa Imelda, Ubay para ning maong katuyuan,” matud ni Aumentado sa iyang taho ngadto sa mga Bol-anon.

Sa iyang kalipay sa maong katikaran, gipapubad usab sa goberndor nga “Nagkadaghan na ang mga dagkong investors nga buot mububo karon sa ilang puhunan sa atong lalawigan, sama sa Puregold, SM, Robinsons ug uban pa. Isip preparasyon sa maong kalamboan, gikinahanglan nga atong masiguro nga igo ang suplay sa kuryente dinhe sa atong lalawigan.”

Pinaagi usab sa pasilidad sa Ubay, diin tukoron usab ang mas daku pa nga solar farm kon itandi sa Dagohoy, matigum na didto ang maharvest nga power, nga tataw nga magamit usab sa Bohol kon mahitabo pag-usab ang pagkahanaw sa mga supply sa koryente nga gikan sa gawas sa lalawigan. (PIABohol)

PUNDOHANAN SA KORYENTE. Gilagdaan na nila Gob Erico Aris Aumentado ug San Miguel Global Power ang katalian nga magpalig-on sa energy resilience sa Bohol sa pagtukod sa BESS. (PIABohol)