79% tsansa nga ang El Nino

mabati sunod 2-3 ka buwan

TAGBILARAN CITY, Bohol (PIA)—Sa labing ulahi nga kasayuran, anaa na sa 79 porsyento nga tsansa nga masinati ang El Nino phenomenon sulod sa sunod nga duha o tulo ka buwan.

Kini ang gibutyag ni Philippine Atmospheric Geophysical and Astronomical Services Administration (PAG-ASA) Bohol chief ug weather forecaster Leonardo Samar, didto sa Kapihan sa PIA.

Kini usab human gipagawas sa PAG-ASA ang El Nino alert niadtong Abril 22, dala sa namatikdan nga kahimtang sa panahon ilabi na sa gipanid-an nga El Nino Southern Oscillation (ENZO) sa central equatorial eastern Pacific.

Giisip nga oceanic indicator sa sagad nga masinati nga paghuwaw matag duha ngadto sa lima ka tuig, ang ENSO nagpakita sa anomaly sa temperature sa kadagatan.

PInaagi sa mamatikdan nga pagtaas sa kainiton sa dagat, mabanabana usab sa PAG-ASA ang kagrabehon sa moabut nga epekto niini nga gitawag og El Nino.

Kon ang pagtaas sa temperatura sa dagat anaa sa 0.5 ngadto sa 0.9. degress celsius, kini isipon nga hinay nge El Nino ug kasagaran matapos ang pagkawaya uwan sa pipila lamang ka buwan.

Apan kon ang pagsaka sa kainit sa temperature sa dagat, moabut na ngadto sa 1.5 o 2.0, isipon na ang epekto niini nga strong o very strong El Nino nga mahimong molanat sa pipila pa ka buwan.

Nunot niini, awhag sa PAG-asa ngadto sa mga Bol-anon, pangandaman samtang magpabiling magmonitor sa PAG-ASA aron magiyahan sa mga kasayuran nga angay mihibaw-an aron makahimo sa mas makinaadmanong desisyon. (PIAbohol)