DHSUD nagtanyag og ‘housing payment

relief’ taliwala sa krisis sa enerhiya

TAGBILARAN CITY, Bohol (PIA)--Agig tubag sa panawagan ni Presidente Ferdinand R. Marcos Jr. alang sa usa ka whole-of-government approach aron mamenosan ang epekto sa krisis sa enerhiya, ang Department of Human Settlements and Urban Development (DHSUD) nagpatuman sa mga programa sa pagtabang sa pinansya nga may kalabotan sa kapuy-an, lakip ang tulo ka bulan nga moratorium sa pagbayad sa balay ubos sa National Home Mortgage Finance Corporation (NHMFC).

Si DHSUD Kalihim Jose Ramon Aliling miingon nga ang mga inisyatiba nahiuyon sa direktiba ni Presidente Marcos Jr. aron matabangan ang mga pamilyang Pilipino gikan sa epekto sa pagsaka sa gasto sa gasolina ug nagpadayong gubat sa Middle East.

“Sa gitna ng energy crisis na nararanasan natin, mahalaga po na mabigyan natin ng kahit kaunting ginhawa ang ating mga kababayan—sa kanilang mga bayarin sa pabahay. Ito po ay bahagi ng ating whole-of-government response sa direktiba ni Pangulong Marcos Jr.,” pamahayag ni Aliling.

Gidugang niini nga nagpadayon ang DHSUD sa pagsulong sa mga programang makatabang nga makuhaan ang epekto sa krisis ngadto sa katawhan.

Ubos sa programa sa moratorium sa NHMFC, ang tanang kwalipikadong manghulam sa tibuok nasod awtomatik nga masakop sulod sa tulo ka bulan gikan Mayo 1 hangtod Hulyo 31, 2026, nga dili kinahanglan nga mag-file og aplikasyon.

May mga 50,000 ka miyembro-benepisyaryo ang mahimong maka-avail sa moratorium.

Ang relief measure nagtugot sa mga nangutang sa temporaryong pagsuspenso sa ilang binuwan nga amortization payments nga walay multa o dugang nga interes. Ang mga termino sa pagpahulam parehas nga gipalugway base sa gidugayon sa moratorium.

Agi og komplemento niini nga inisyatiba, ang Pag-IBIG Fund mi-aprobar usab sa usa ka espesyal nga pakete sa benepisyo alang sa mga OFW nga gipapauli tungod sa nagpadayon nga panagbangi sa Middle East, nga nagpalig-on pa sa hiniusang tubag sa DHSUD sa nag-uswag nga global ug domestic nga mga hagit.

Ubos sa gi-aprobahan nga package sa benepisyo, ang mga kwalipikadong OFW nga miyembro mahimong mo-aplay sa pag-withdraw hangtod sa 100% sa ilang Pag-IBIG Regular Savings, lakip na ang ilang bahin sa empleyado, bahin sa amo, ug mga dibidendo nga nakuha, bisan sa wala pa ang 20 ka tuig nga maturity; pag-withdraw hangtod sa 100% sa ilang Modified Pag-IBIG II o MP2 Savings, apil ang mga pagbalik nga nakuha, bisan sa wala pa ang 5 ka tuig nga maturity; o pag-avail sa 3 ka bulan nga moratorium sa pagbayad sa Pag-IBIG Housing Loan, libre sa interes ug mga silot, nga ang loan term gilugwayan og tulo ka bulan.

Niadtong Pebrero 2026, ang Pag-IBIG Fund adunay dul-an sa 900,000 ka rehistradong OFW nga miyembro sa Middle East.

Gihatagan og gibug-aton sa DHSUD nga ang hiniusang interbensyon gikan sa NHMFC ug Pag-IBIG Fund nahimong kabahin sa mas lapad nga estratehiya aron mapanalipdan ang mga pamilyang Pilipino gikan sa ekonomikanhong mga pagpit-os nga dala sa krisis sa enerhiya, samtang nagsuporta usab sa mga huyang nga sektor sama sa mga repatriated OFWs. (ECB/PIA7-Bohol)

Magpatuman ang Department of Human Settlements and Urban Development (DHSUD) og housing payment relief isip tabang sa mga pamilyang apektado sa krisis sa enerhiya. Apil na niini ang 3-buwan nga moratorium sa housing loans sa NHMFC ug espesyal nga benepisyo alang sa mga repatriated OFW ubos sa Pag-IBIG Fund. (PIA)