Kapolisan sa Bohol nakadawat og

P95-M nga kantidad sa mga ekipo

TAGBILARAN CITY, Bohol (PIA)--Gitugyan sa Bohol Police Provincial Office (BPPO) ang kapin sa P95 milyones nga kantidad sa mobility ug information technology assets sa pagpanguna ni Police Regional Office 7 Acting Regional Director Arnold E. Abad atol sa iyang inaugural command visit sa probinsiya niadtong Lunes, Abril 27, 2026.

Ang pagbisita ug pagtugyan sa mga ekipo gidungan sa Traditional Monday flag-raising ug awarding ceremony nga gipangunahan ni Abad kauban si Bohol Gob. Erico Aristotle Aumentado ug Provincial Director Patricio C. Degay Jr.

Gitambungan usab kini sa mga local chief executives ug police commanders gikan sa nagkalain-laing mga lungsod.

Nakadawat ang BPPO og ICT equipment nga nagkantidad og P51.14 milyones, lakip na ang scanners, printers, biometric fingerprint devices, webcams nga adunay tripods, ug USB storage units nga gituyo aron mapausbaw ang administrative ug investigative operations.

Gawas niini, nakadawat usab ang BPPO og mobility assets nga nagkantidad og P44.69 milyones, nga naglangkob sa Toyota Hilux 4×4 patrol jeeps, Mitsubishi Triton carrier trucks, Toyota Innova, ug Honda dirt bikes.

Kini nga mga sakyanan gipang-apod-apod sa mga police stations sa tibuok probinsya, apil ang Baclayon, Panglao, Tubigon, Jagna, Loboc, Loon, ug uban pang lungsod, ingon man sa Tagbilaran City Police Station ug Bohol Tourist Police Unit.

Ang mga bag-ong kahimanan pormal nga gibendisyonan atol sa seremonyas ni Rev. Fr. Bernadine Jade Dionne Balite.

Sa iyang mensahe, si Abad nagkanayon nga ang inisyatiba nagpakita dili lamang sa pagpauswag sa kapabilidad kondili sa lig-on nga suporta sa institusyon gikan sa pamunoan sa PNP, pagsiguro nga ang mga personahe sa yuta nasangkapan aron matubag ang nag-uswag nga mga panginahanglanon sa seguridad.

Gi-awhag niya ang mga kawani sa pulisya nga magpabilin sa pasalig sa mga katungdanan sa pagpatuman sa balaod ug propesyonal nga integridad.

Ang mga opisyal nag-ingon nga ang pag-abot sa bag-ong mga ekipo gilauman nga makapauswag sa paglihok sa pulisya, kapabilidad sa pagtubag, ug kahusayan sa imbestigasyon sa probinsya.

Si Tagbilaran City Mayor Jane Yap nagpasalamat sa ‘perfect timing’ nga pagdawat sa 2 ka patrol cars ug nagpasalamat usab sa lig-on nga partnership sa PNP.

“Makatabang gyud kini dako sa mas lig-on ug mas paspas nga pagpatuman sa atong mga programa para sa peace, order, ug safety dinhi sa Tagbilaran,” matud pa ni Yap. (ECB/PIA7-Bohol)

Gitugyan ni (L-R) Police Regional Office 7 Acting Regional Director Arnold E. Abad atubangan ni Gob. Erico Aristotle C. Auemtando ngadto kang Bohol Police Provincial Office (BPPO) Provincial Director PCOL Patricio C. Degay Jr. ang seremonyal nga yawe sa sakyanan ug uban pang mga ekipo sa Kampo Dagohoy sa syudad sa Tagbilaran niadtong Lunes, Abril 27, 2026. Kinatibuk-ang P95 milyones nga kantidad sa mga ekipo and nadawat sa kapolisan sa Bohol. (PNP Bohol photo)