PCA gipalapdan pa ang medical benefits

alang sa mga mag-uuma og lubi sa Bohol

TAGBILARAN CITY, Bohol (PIA)--Gipalapdan pa sa Philippine Coconut Authority (PCA) ang medical nga mga benepisyo sa mga mag-uuma og lubi sa lalawigan sa Bohol.

Kini human milagda og memorandum of agreement (MOA) ang PCA sa pagpanguna ni PCA-7 Regional Manager III Aurora Paquibot ug sa Holy Name University (HNU) Medical Center Inc. sa pagpanguna ni Fr. Lucio Pedro Dayag, SVD, Chief Executive Officer alang sa Hospitalization Assistance sa mga rehistradong mag-uuma og lubi ug ilang mga benipisyaryo sa Bohol niadtong Abril 23, 2026.

Mao na kini ang ikatulong tambalanan nga katambayayong sa PCA alang niining programa human nakalagda na usab sila kaniadto og MOA sa Gov. Celestino Gallares Memorial Medical Center (GCGMMC) ug Allied Care Experts (ACE) Medical Center.

Ang maong programa gibase sa Republic Act 11524 o Coconut Farmers & Industry Trust Fund (CFITF) ug ubos sa Coconut Farmers & Industry Development Plan (CFIDP) Hospitalization and Medical Care Program.

Matud pa ni PCA-Bohol Provincial Manager Jovencio Felisilda, tumong sa programa ang pagtabang sa mga mag-uuma og lubi sa ilang medical nga panginahanglan, lakip ang ilang legal dependents sama sa asawa, bana, common law partner, ug mga anak nga 21 anyos paubos o kung sobra pa, basta adunay medical nga panginahanglan.

Ang benepisyo sa hospitalization coverage naglangkob sa P40,000.00 alang sa confinement sa tambalanan, samtang adunay P5,000.00 post-confinement coverage o outpatient coverage.

Gitin-aw ni Felisilda nga dili cash ang ihatag apan ang PCA mohatag og guarantee letter nga direkta nga mobayad sa mga tambalanan o parmasya.

Ubos sa social protection program sa PCA, magpadayon usab ang mobile health services ug medical missions sa mga Geographically Isolated and Disadvantaged Areas (GIDA) sa Bohol.

Gidasig sa PCA ang mga mag-uuma og lubi sa pagparehistro sa National Coconut Farmers Registration System (NCFRS) pinaagi sa mga social workers sa PCA Provincial Offices. (ECB/PIA7-Bohol)

Gilagdaan nila (L-R) PCA-Bohol Provincial Manager Jovencio Felisilda, PCA-7 Regional Manager III Aurora Paquibot, Holy Name University Medical Center Inc. Chief Executive Officer Fr. Lucio Pedro Dayag, SVD, ug Holy Name University Medical Center Inc. Hospital Administrator Katherine Kaye Agonia ang Memorandum of Agreement (MOA) alang sa Hospitalization Assistance sa mga rehistradong mag-uuma og lubi ug ilang mga benipisyaryo sa lalawigan sa Bohol niadtong Abril 23. (PCA photo)