Villamor nanawagan sa PTDC:

Sabutan ang tourism charges

TAGBILARAN CITY, Bohol, (PIA)—Sa dili pa mag-iyahay ang mga sakop sa industriya sa turismo sa pagpresyo sa serbisyo niini, giaghat sa usa ka magbabalaod sa Bohol ngadto kang Gobernador Erico Aristotle Aumentado nga tigumon ang Provincial Tourism Development Council (PTDC), aron hisgutan ang mga angay buhaton aron maplastar na ang opisyal nga mga balayranan sa mga turista.

Sa usa ka privilege speech, mibarug si Board Member Jiselle Rae Villamor satul sa sesyon sa Sangguniang Panlalawigan aron pangunahan ang mas gikinahanglan nga konsultasyon sa mga stakeholders ug mga katawhan, sa dili pa ipatuman ang bisan unsa nga pag-usbaw sa mga balayranan sa turismo taliwala sa nagpadayon nga krisis.

Si Villamor, kinsa maoy chairperson sa Tourism Committee mipasabut nga kon pasagdan kini, may mahitabo nga price fragmentation diin kon walay tataw nga batakan ang mga balayranan nga kobrahon sa mga turista, mahimong kini makapahugno na hinuon sa industriya.

Una na nga gipadayag sa babayeng magbabalaod nga diha nay lakang nga ipakang na dayon ang 40% nga umento sa mga balayronon sa turista, samtang diha na usab sugyot nga ang usbaw sa balayranan, ang presyo sa usbaw sa gasolina usab una ang basehan.

Sa wala pa kini mahimong opisyal, gitataw ni Villamor nga gikinahanglan nga kon may ipatuman man nga usbaw, kini reasonable ug gipahaum sa unsay standard.

Niini, giaghat sa magbabalaod nga tigumon ang PTDC nga gipangulohan ni gobernador Aumentado ug sa pribadong sektor nga kaabag niini aron sa labing dali nga panahon, ikapangunsulta ang mga angayan nga lakang alang sa unipormadong sistema sama sa fare matrix, aron mahiusa ang pagpresyo.

Human niini, ang PTDC na usab ang magpagawas sa sumbanan ngadto sa publiko, tungod kay matud pa ni Villamor, kon dili kini mahimo, kahadlokan nga mahitabo ang price fragmentation, nga maoy ikadaut usab sa industriya. (PIAbohol)

SUBAY SA TOURISM CODE. Matud ni Board Member Jiselle Rae Villamor, ang Tourism Code nagpatin-aw nga sa ingon niini nga mga panahon, ang multi-sectoral Provincial Tourism Development Council maoy magdala sa mga desisyon aron ikapaseguro ang ka-angayan ug patas nga mga kausaban, ilabi na sa mga balayranan sa turismo. (PIAbohol)