ATI-7 nipasidaan batok sa mga scammers nga

nang-solicit, nag fund-raising gamit ang ahensya

TAGBILARAN CITY, Bohol (PIA)—Ang Agricultural Training Institute (ATI) Central Visayas nipasidaan sa publiko batok sa scammer nga nang solicit ug nangayo og pondo alang sa giingong kalihokan sa ahensya.

Matud pa sa scam alert nga gipagawas sa ATI niadtong Hunyo 10, usa ka tawo nga ginganlan og Jennifer Laquesta, nga naggamit sa numero nga 09616293202, ang nagpakaaron-ingnong sekretarya sa OIC-Center Director sa ATI-Central Visayas nga si Vianney T. Ojerio.

Giingong gipunting niini nga scammer ang mga provider sa ATI nga adunay mga malimbungon nga email nga naggamit sa opisyal nga logo sa institusyon, pirma sa direktor, ug mga kredensyal sa kauban aron mangayo og pondo alang sa mga biktima sa kalamidad.

Kusganong gikondena sa ATI-Central Visayas kining maong aktibidad.

Matud pa nga ang maong indibidwal dili konektado sa ATI, ug ang institusyon dili gayud mangayo og mga donasyon nga salapi.

Gisubli sa ahensya nga walay mga indibidwal o organisasyon ang gitugotan nga mogamit sa ngalan sa ATI, mga opisyal ug kawani niini, alang sa pagpangayo og mga fund-raising nga kampanya.

Gi-klaro usab sa ATI nga ang ilang mga sulat dili mogamit og e-signature ug kini opisyal nga gilagdaan nga gipagawas sa ilang Document Control Center Office.

Gitambagan ang publiko nga magpabiling mabinantayon ug susihon ang tanang komunikasyon sa institusyon.

Dugang pa, gitambagan usab ang publiko nga dili tubagon o dawaton ang bisan unsang komunikasyon gikan sa nahisgotang indibidwal.

Gi-awhag ang publiko nga i-report dayon ang bisan unsang kadudahang pagsulay pinaagi sa pagkontak sa opisyal nga mga channel sa ATI. (ECB/PIA-7 Bohol)

Nagpagawas og scam alert ang Agricultural Training Institute (ATI) Central Visayas niadtong Hunyo 10 nga nipasidaan sa publiko batok sa scammer nga nang solicit ug nangayo og pondo alang sa giingong kalihokan sa ahensya. Gi-awhag ang publiko nga i-report dayon ang bisan unsang kadudahang pagsulay pinaagi sa pagkontak sa opisyal nga mga channel sa ATI. (ATI/PIA)