Bohol magpadala og search & rescue teams,

P5-M nga hinabang pinansyal sa Mindanao

TAGBILARAN CITY, Bohol (PIA)—Ang kagamhanang probinsiyal sa Bohol mopakatap og mga rescue team ug magpadala og hinabang pinansyal sa Mindanao human sa magnitude 7.8 nga linog nga miigo sa SOCCSKSARGEN region niadtong Hunyo 8.

Ang Provincial Disaster Risk Reduction and Management Council (PDRRMC) nipatawag og special meeting niadtong Hunyo 8 didto sa Provincial Capitol, nga gipangulohan ni Bise Gobernador Nicanor Besas.

Gitigom niini ang mga representante gikan sa mga opisina sa probinsiya, nasudnong ahensya sa gobyerno, ug mga humanitarian nga organisasyon aron hisgotan ang mga lakang aron matabangan ang mga naapektuhan.

Ang mga diskusyon nakasentro sa giplano nga pagdeploy sa probinsya sa mga personahe ug kahinguhaan aron suportahan ang mga operasyon sa pagtubag sa mga apektadong lugar.

Si Provincial Disaster Risk Reduction and Management Office (PDRRMO) head Dr. Anthony Damalerio miingon nga ang Bohol mopakatap og duha ka Search, Rescue, and Retrieval (SRR) teams aron motabang sa relief ug response efforts.

Usa ka team nga may lima ka rescue personnel ug usa ka drayber ang idestino sa Sarangani province, samtang laing team nga parehas og komposisyon ang moadto sa General Santos City. Ang duha ka team gikatakda nga mobiya sa Hunyo 9 sa gabii.

Ang konseho nirekomendar sa pag-aprobar sa financial assistance alang sa mga apektadong local government units pinaagi sa Disaster Risk Reduction and Management Fund sa probinsiya.

Gi-presentar ni Provincial Budget and Management Officer Peter Retutal ang gisugyot nga package: ₱2 milyon alang sa General Santos City, ₱1.5 milyon alang sa Sarangani province ug ₱1.5 milyon alang sa South Cotabato.

Molusad usab ang kagamhanang probinsiyal og donation drive alang sa mga Bol-anon aron makatabang sa mga apektadong komunidad.

Samtang ang Provincial Health Office (PHO) gitahasan usab sa pag-organisar og medical team alang sa posibleng deployment sa mga apektadong lugar.

Sa buwag nga pamahayag, si Gobernador Erico Aristotle Aumentado nipadayag og simpatiya ug pakighiusa sa mga biktima sa linog.

“Makasubo ang nakita nato nga trahedya mahitungod sa pagtay-og sa yuta nga nasinati sa atong mga higala sa Mindanao, ilabi na sa habagatang bahin niini,” matud pa niini.

Si Aumentado, nga naa sa Canada kauban ang ubang mga gobernador alang sa mga kalihokan sa Governance for Climate and Disaster Resilience, miingon nga ang Bohol lig-on nga nagbarog uban sa katawhan sa Mindanao.

“Kita sa Probinsiya sa Bohol, nibarog kuyog sa mga pinalangga natong mga Mindanawon nga karon nag-atubang sa usa ka dakong hagit. Ato silang i-ampo nga makatindog pag-usab, ug kita kanunay'ng andam nga mutabang, mubarog, ug makiglambigit,” matud pa ni Aumentado. (ECB/PIA-7 Bohol)

Human sa magnitude 7.8 nga linog nga miigo sa Mindanao, ang Bohol Provincial Disaster Risk Reduction and Management Council (PDRRMC) nipatawag og espesyal nga tigom niadtong Hunyo 8 sa Gobernador's Office sa Provincial Capitol nga nagtigom sa mga representante gikan sa mga hingtungdang buhatan sa probinsiya, nasudnong ahensya sa gobyerno, ug mga humanitarian nga organisasyon aron hisgutan ang mga lakang sa pagtabang sa mga apektado sa linog. (ECB/PIA-7 Bohol)