Sugod Pebrero 12, mga drainage trabahoon…

DPWH: Magmatngon sa road closures

Tungod sa mga drainage construction

TAGBILARAN CITY, Bohol (PIA)— Sugod sa Huwebes Pebrero 12 ngadto na sa Miyerkoles Febrero 18, dili una paagi-an ang CPG East gikan sa A. Pahang Street duol sa Barrete Fruit Stand paingon sa S. Ligones Street tungod sa Smoque Bistro.

Kini kay matud pa sa Department of Public Works and Highways (DPWH), ilang ipatuman ang Construction and Maintenance of Flood Mitigation Structures ug Drainage Systems didtong dapita.

Segun sa pahibalo nga gipagawas ni District Engineer Gascon, ipatuman ang construction sa Flood Mitigation Structure subay sa Habitat Road paingon sa CPG East.

Niini, may mga pagkubkob sa drainage nga mahitabo nga gikinahanglan aron matubag ang suliran sa pagbaha nga delikado sa katawhan ug mga kabtangan, segun sa DPWH.

Dungan usab niini, giaghat ang kadtong tig-agi-an sa nahisgutan nga lugar sa paglikay una, pinaagi sa paggamit sa Bohol Circumferential Road o kadtong paingon sa Dao Integrated Bus Terminal, sa pag-saka sa G Dangoy gikan sa Baclayon paingon na sa tiilan sa Banat-I Hill.

Sa laing bahin, sa Pebrero 18, sugdan na usab sa Department of Public Works and Higways sa pagpatuman sa construction ug pag mintinar sa drainage system gikan sa eskina Penaflor ngadto sa atbang sa Bohol Wisdom School.

Ug tungod niini, temporary nga bukas ang katunga sa lane sa karsada nga paingon pasulod sa Tagbilaran City, samtang trabahoon na ang pagsumpay sa canal ngadto sa outfall sa gihiusang wastewater treatment sa mga barangays sa Cogon, Booy ug Taloto.

NIini usab, giaghat ang mga motorista ug tig-agi-an sa nahisgutan nga dalan sa pagsayo o pagpangita og laing agi-anan aron dili malangan samtang magpulihanay og agi ang pasulod ug pagawas sa Tagbilaran didtong dapita.

Matud ni District Engineer John Paul Gascon, gikinahanlan ang dugang pagkubkob aron matubag ang kasamtangan nga suliran sa pagsaka sa tubig nga delikado sa mga katawhan ug mga motorista

Ang proyekto sa pagtrabaho, nasukip sa Contract ID No 25HA0020 ug kini alangs a construction ug maintenance sa flood mitigation structures ug drainage systems, phase 4.

Kini nga pagtrabaho magkubkob aron ikasumpay ang cross pipe drainage aron matarung na ang drainage efficiency ug luwas nga pagbyahe sa katawhan.

Niini, gipasalig sa DPWH nga magpahimutang og magdumala sa trapiko ug nga pahibaw aron maseguro nga luwas ang mga moagi samtang giaghat usab sa ahensya ang katawhan nga magmatngon samtang aduna pay nagtrabaho. (PIABohol)