3 ka bino bag-ong produkto

Sa CVAARRDC exhibit sa ICM

TAGBILARAN CITY, Bohol (PIA)— Tulo ka matang sa bino: usa gikan sa ube kinampay, ug ang usa, gikan sa bunga sa nipa ang duha lamang sa pipila ka mga produkto nga gipasundayag sa nagpadayon nga exhibit sa Central Visayas Agriculture, Aquaculture and Natural Resources Research and Development Consortium. (CVRRAADC) sulod sa Island City Mall.

Sa exhibit makita ang mga produkto gikan sa umahan ug sa mga pangisdaan sa mga Bol-anon nga mag-uuma nga gipaagi sa pag-ugmad sa research aron motaas ang bili ug mas mabulahan ang mga mag-uuma.

Ang ube wine, bino nga gikan sa giproseso nga ubi kinampay isip semi dry nga diin sa matag dimdim, mamatikdan ang nanungatunga nga kaaslum ug katam-is, apan matagamtam gihapon ang lami ug humot sa ubi, mugna sa usa ka research sa Bohol Island State University (BISU).

Gikan sa Balintawak Talibon, ang Farmer’s brew rice wine ang usa sa mga bino nga mapalit ug matilawan dayon.

Sa laing bahin, ang Nipa Fruit Wine, usa ka sweet wine, nga sa matag dimdim, mangibabaw ang katam-is apan may dyutay nga timailhan sa bino.

Gawas sa mga bino, mahimong usa sa mga sikat nga produkto ang crabtastic: alang s amga hilig sa alimango apan, kon walay kuha, ang crabtastic maoy solbad.

Unod sa alimango nga gisiha ug giproseson na aron makaon na dayon, ang crabtastic us aka food technology research innovation sa usa ka batan-on nga taga Inabanga, ug mapalit sa orihinal ug sa haling nga kalami.

Makit-an usab didto ang mga produkto sa Palayamanan nga mga mag-uuma sama sa ginaling nga dahon sa kamunggay, instant salabat, ampaw, banana chips, rice sinangag coffee atsara, cassava chips, guso chips ug mga pagkaon nga nagtanyag sa nagkadaiyang lami.

Ang exhibit taposon na sa Marso 25. (PIAbohol)

BINO KINAMPAY. Gawas sa matagamtam ang pait-aslum-tam-is nga lami sa ubi nga Bol-anon, ang ube wine sakto lang nga mugna alang sa mga buot saulogon ang kakugi sa mga mag-uuma nga nagpakaon sa nasud. Kampai. (PIABohol)