Aumentado namarayeg sa PCSO

sea ambulance para sa mga isla

TAGBILARAN CITY, Bohol (PIA)—Sea Ambulance alang sa mga lungsod nga adunay mga isla, kini maoy gipamarayeg ni Gobernador Erico Aristotle Aumentado sa Philippine Charity Sweepstakes Office (PCSO), imbes ambulansya, pag-anhi sa PCSO dinhi.

Ang paghangyo sa goberandor ngadto sa PCSO, gibungat ni Aumentado didto sa programa nga nagtugyan sa PCSO sa 12 ka mechanical ventilators nga nagkantidad og P13 milyones, niadtong Biyernes Marso 20, 2026.

Mismo si PCSO General Manager Melquiades Robles ang mingtunol sa ekipos ngadto kang Gob Aumentado dungan sa pag-ingon nga ang PCSO halos makakompleto na og hatag og suporta alang sa health care ngadto sa 47 ka mga kalungsuran ug syudad sa Tagbilaran pinaagi sa paghatag og mga PCSO ambulance.

Dinhi nakita sa gobernador ang panginahanglan usab sa sea ambulance, nga pasuportahan sa PCSO.

Sa Bohol, ang Loon, Calape, Tubigon, Baclayon ug Panglao may mga isla nga ana sa Unang Distrito samtang ang Clarin Inabanga, Buenavista, Getafe, Talibon, Bien Unido, Carlos P. Garcia ug Ubay may mga isla usab sa Segundo Distrito ug ang Mabini ug Candijay may mga isla usab sa ikatulong Distrito.

Nagtuo si Aumentado nga kini may dakung ikatabang sa dinali-ang pagtransport sa mga pasyente nga may ikauban nga mga mga medical teams alang sa dinali-ang pagtagad.

Sa laing bahin, ang PCSO nga nagdala sa mga mekanikal nga makina alang sa pagpanambal sa mga pasyente nga naglisud og ginhawa, ilabi na sa mga pasyente nga anaa na sa intensive care units (ICU) sa mga tambalanan.

Sa 12 ka mga ventilators, ang unom adto paingon sa Cong. Garcia Memorial hospital sa Talibon; tulo adto sa Cong. Teodoro Galagar Memorial Hospital sa Jagna; tagsa ka units sa Catigbian District Hosptial, Catigbuan; Francisco Dagohoy Memorial Hospital, Inabanga town; ug Cong. Simeon Toribio Memorial hospital sa Carmen.

Pinaagi niining mga donasyon, mapalig-on sa Bohol ang pagpangandam sa mga ospitals a probinsya ilabi na sa mga bag-ong nanggawas nga mga sakit ug dinagkong suliran sama sa pandemya nga COVID nga nasinati sa Bohol, dayags a gobernador. (PIABohol)

DUGANG PAGPANGANDAM. Namarayeg si Gob Erico Aristotle Aumentado ngadto sa PCSO alang sa sea ambulance sa mga kalungsuran nga may mga isla; us aka kritikal nga pagsuguro sa kaluwanan sa kinabuhi diin may kasegurohan sa dinaliang pag-atiman sa pasyente samtang nagpaingon pa sa tambalanan. (PIABohol/Photo by RVO)