DOLE, mi-awhag sa mga illegal Filipino workers 

sa Qatar nga mobalik na sa nasod

MANILA, November 21 (PIA)--Sa dili pa matapos ang duha ka semanang tagal, gi-awhag sa Department of Labor and Employment (DOLE) ang mga Filipino worker nga ilegal nga namuyo sa Qatar nga mobalik na sa nasod.

Matud pa ni DOLE Kalihim Silvestre Bello III, dili na angay hulaton pa sa mga ‘undocumented’ Filipino worker ang gihatag nga tagal gikan Setyembre 1 hangtud Disyembre 1 karong tuig.

Pasabot pa ni Bello, kini aron malikayan ang pagbaton og komplikasyon sa mga gideklarang illegal foreigners sa Qatar.

Giingong kinahanglan usab mo-agi sa saktong exit procedures ang mga trabahante pinaagi sa pagkonek sa search and follow up department sa Qatar sulod sa amnesty period.

Sakop sa maong amnestiya ang tanang langyaw nga milapas sa Law No. 4 niadtong 2009 diin nahisulod ang entry, exit, residence ug sponsorship sa illegal foreigners.

Kini ang labing unang amnesty program nga gipatuman sa gobyerno sa Qatar sulod sa napulog-duha ka tuig. (ecb/PIA7-Bohol)