Pagbukas og balik sa voters 

registration, sugod na karong adlawa

TAGBILARAN CITY, November 7 (PIA)--Nagpahinumdom ang Commission on Elections (COMELEC) sa publiko nga sugod karong adlawa, buksan og balik ang voters registration alang sa Barangay ug Sangguniang Kabataan (SK) elections alang sa sunod tuig.

Bisan molanat og lima ka bulan ang ilang gitakdang schedule sa pagpa-rehistro, gi-awhag sa COMELEC ang mga botante nga magparehistro og sayo.

Matud pa sa COMELEC, modawat sila og aplikasyon gikan Lunes hangtud Sabado gikan alas 8:00 sa buntag hangtud alas 5:00 sa hapon.

Magbukas usab sila bisan holiday gawas na lamang sa Disyembre 24 ug 25 ug sa Abril 13 ug 14.

Gibanabanang naa sa lima ka milyong botante ang gipaabot sa COMELEC nga magparehistro sa pagbukas og balik sa voters registration. (ecb/PIA7-Bohol)