Ekonomiya sa nasod, milambo sa 

6.6% sa katapusang kwarter sa 2017

MANILA, Enero 23 (PIA)--Milambo sa 6.6% ang gross domestic product (GDP) sa nasod sa katapusang kwarter sa tuig 2017.

Dakong natampo sa paglambo sa ekonomiya ang sektor sa industiya nga nakapatala og 7.3 porsiyentong growth rate alang sa 4th quarter sa 2017.

Samtang 6.8% usab ang natalang growth rate sa services sector.

Matud pa ni National Statistician Lisa Grace Bersales, sa kinatibuk-an sa tuig 2017, nakatala og 6.7% nga paglambo sa ekonomiya sa nasod.

Apan ang 6.7% full-year GDP growth alang sa tuig 2017, mas ubos kun itandi sa natala niadtong 2016 nga 6.9%.

Matud pa usab ni National Economic Development Authority (NEDA) Director General ug Socioeconomic Planning Kalihim Ernesto Pernia, nagpabilin ang Pilipinas nga usa sa adunay ‘fastest growing economy’ sa Asya.

Nagsunod ang Pilipinas sa China ug Vietnam nga nakatala og 6.9% ug 6.8% nga growth rate.

Matud pa nga ang 2016 ug 2017 economic growth rate sa Pilipinas makunsiderar nga “strong and steady” alang sa 2018 nga target sa gobyerno. (ecb/PIA7-Bohol)

================

POEA, nagpahinumdom batok sa 

paggamit og pekeng dokumento

TAGBILARAN CITY, Enero 23 (PIA)--Subling gipahinumdoman sa Philippine Overseas Employment Administration (POEA) ang mga trabahanteng Pinoy sa dili paggamit og mga pekeng dokumento alang sa ilang aplikasyon sa trabaho sa ubang nasod.

Nipagawas ang POEA sa maong pasidaan human sila makadawat og mga taho ug reklamo gikan sa foreign employer tungod sa mga pekeng certificate of employment sa mga OFW nga na-rekrut ug gi-deploy alang sa Middle East ug sa uban pang nasod.

Gibutyag sa POEA nga apil sa ginahimo sa uban ang pagsumiter og pekeng employer certificate sa aplikante diin pipila ka kaso ginahimo sa pipila ka licensed recruitment agency nga adunay pagtugot sa mga trabahante, aron mapakita nga nasunod nila ang work experience ug training requirement nga gikinahanglan sa employer.

Apan human ang pagberipika sa nag-unang source, natino nga ang pipila ka aplikante wala mipaubos o wala nakatapos sa training program, o wala nagtrabaho sa kompanya o institusyon nga nakasulat sa ilang sertipikasyon.

Kining mga sayop nga buhat magbutang sa kakuyaw sa mga OFW ug mahimong mag-resulta og deportasyon, pagkabilanggo ug ma-blacklist sila ug dili na tugotang maka-trabaho pa sa ubang nasod, matud pa sa POEA.

Gipahinumdoman usab ang tanang lisensiyadong recruitment agencies nga obligasyon nila nga mopili ug mag-deploy og mga trabahanteng adunay katakos ug angayan nga trabahante ug mosunod sa sumbanan sa pag-rekrut ug pag-deploy.

Nipasidaan usab ang POEA sa mga placement agency nga mag-amping ug magbinantayon sa pag-beripika kun sakto ba ang mga dokumento nga gisumiter sa mga aplikante.

Matud pa nga kinahanglang kahibalo ang trabahante ug recruitment agency nga may kaanib nga tulobagong administratibo ug kriminal ang bisan unsang paglapas sa balaod ug regulasyon sa pag-empleyo sa ubang nasod. (ecb/PIA7-Bohol)

=================

100,000 slots sa passport 

appointment, gibuksan sa DFA

TAGBILARAN CITY, Enero 23 (PIA)--Nagbukas karon og 100,000 slots ang Department of Foreign Affairs (DFA) alang sa appointment sa pagkuha og passport sugod karong buwan sa Pebrero hangtod sa Mayo.

“Good news! 100,000 slots are currently available. Schedule your appointments at passport.gov.ph,” matud pa sa gi-post sa DFA Philippines sa ilang twitter account karong adlawa.

Kini human sa mga nadawat nga reklamo sa mga netizens ning bag-o lang kalabot sa sistema sa website sa DFA diin giingong puno na ang mga schedule hangtod sa Marso.

Una na usab gilusad sa buhatan ang “Passport on Wheels” program sa Metro Manila, ug gi-planohan usab sa DFA ang pagdugang og mga consular offices sa tibuok nasod human sa nagkadaghang demand sa pagkuha og pasaporte. (ecb/PIA7-Bohol)