Bag-ong atraksyon sa Bohol: 

Island hopping sakay sa yate 

TAGBILARAN CITY, Mayo 21 (PIA)--May nadugang na usab nga bag-ong atraksyon sa isla sa Bohol diin malingaw gayud ang mga langyaw ug lokal nga mga turista. 

Gilusad niadtong Sabado sa Marine Adventure, Inc. ang “DreamCat,” usa ka ‘world-class’ nga yate nga magtanyag og island cruise o island hopping libot sa lalawigan o sa silingan’g lalawigan sa Bohol. 

Matud pa ni Peter Fleischmann, usa sa mga tag-iya sa Marine Adventures, Inc. nga ang maong yate modala sa mga turista ngadto sa mga isla sa Balicasag, Pamilacan, Cabilao, lakip na usab sa mga silingan’g isla sa Mactan ug Oslob sa Sugbo, ug bisan sa Apo island sa Negros Oriental ug Siquijor. 

Parte usab sa itineraryo o byahe sa maong yate ang ‘night cruise’ sa Tagbilaran Bay. 

Ang regular rate sa cruise P4,500 matag usa apan may itanyag silang introductory rate nga P3,600 matag usa alang sa unom ka oras nga cruise diin lakip na niini ang mga pagkaon ug ilimnon. 

Ang labing unang paglawig sa “DreamCat” gitakda karong Hunyo 1. 

Kini ang labing unang cruise o paglawig latas sa kadagatan sa Bohol nga magdala og mga bisita sa nagkalain-laing island destinations. 

Gibutyag pa ni Fleischmann nga makigkita pa sila sa mga haligi sa industriya sa turismo sa Bohol aron pagkuha sa ilang mga sugyot alang sa ilang pinal nga rota ug inadlaw nga destinasyon. 

Nitambong sa paglusad sa DreamCat niadtong Sabado didto sa Pier 1 ning dakbayan sila Tagbilaran City Mayor John Geesnell Yap II, Dauis Mayor Miriam Sumaylo, Provincial Tourism Chair Lucas Nunag, BAHRR President Allen Christian Varquez, Bohol Tourism Office head Jo Remolador, Investment & Promotions head Inday Dominise, Tagbilaran City Tourism Officer Shobel Ligalig, Bohol Chronicle chair Peter Dejaresco, tour operators Nonete Bolo, Lourdes Sultan ug Zarah Dejaresco. (ecb/PIA7-Bohol). 

Gi-inagurahan niadtong Sabado ang “DreamCat”, usa ka world-class’ nga yate nga bag-ong atraksyon sa Bohol nga magtanyag og island cruise o island hopping libot sa lalawigan o sa silingan’g lalawigan sa Bohol. (ecb/PIA7-Bohol).