Comelec, nipahinumdom sa mga nidagan sa Brgy. 

ug SK eleksyon sa pagduso sa ilang SOCE 

TAGBILARAN CITY, Mayo 22 (PIA)--Nipahinumdom ang Commission on Elections (Comelec) sa tanang mga nidagan sa milabay nga Barangay ug Sangguniang Kabataan (SK) elections sa pagduso sa ilang Statement of Contributions and Expenses (SOCE). 

Nidaog o napildi man ang usa ka kandidato, obligado silang moduso sa ilang SOCE. 

Kinahanglan usab moduso kadtong mga na-disqulified nga mga kandidato. 

“Winners, losers, or even disqualified candidates must file their SOCEs,” matud pa ni James Jimenez, ang tigpamaba sa Comelec. 

Gitakda sa Comelec sa Hunyo 13 o 30 ka adlaw human sa adlaw sa piniliay ang katapusang adlaw sa submission sa SOCE. 

Base sa Section 14 sa Republic Act 7166, gikinahanglan ang pag-file sa SOCE diin ang mapakyas sa pagduso niini did-an sa paglingkod sa pwesto kadtong mga nidaog nga kandidato hangtod sila makaduso. 

Gipahinumdoman usab sa Comelec ang mga kandidato nga kinahanglang lagdaan og personal ang ilang SOCE. 

Mahimong ma-download ang SOCE forms sa ilang website nga www.comelec.gov.ph. (ecb/PIA7-Bohol).