Mga bag-ong lingkod nga brgy chairman, hatagan og 3 

semana aron makasumiter sa BADAC accomplishment 

TAGBILARAN CITY, Mayo 25 (PIA)--Obligahon sa Department of Interior and Local Government (DILG) ang mga bag-ong lingkod nga barangay chairman nga magsumiter sa ilang Barangay Anti-Drug Council (BADAC) accomplishment sulod sa tulo ka semana. 

Matud pa ni DILG Undersercretary for Baranggay Affairs Martin Diño, gisugyot niya kang DILG Kalihim Eduardo Año nga sa paglingkod sa mga bag-ong napiling Barangay Chairman sa Hulyo, hatagan sila og tagal sa pagsumiter sa BADAC. 

Sakop niini ang tanang mga barangay sa nagkalain-laing lugar sa nasod, gawas na lamang sa Marawi ug sa uban pang war-stricken areas nga wala pa’y mga natudlong kapitan. 

Gipasabot ni Diño nga trabaho man sa mga barangay chairman ubos sa balaod ang pagbaton og BADAC tungod kay pinaagi niini, magbaton og aktibong kasalmotan ang barangay sa pagsumpo sa ilegal nga droga. 

Nipasidaan si Diño nga kun mapakyas sa pagsumiter og BADAC, angay lamang nga pasakaan og kaso ang mga opisyal og ‘dereliction of duty’ o pagpasagad sa katungdanan. 

Sa wala pa ang eleksyon niadtong Mayo 14, naa sa 41,354 gikan sa 42, 036 ka mga barangay ang nakasumiter og BADAC apan gi-review pa sa DILG ang kapin sa 600 niini kun functional ba gayud kini o dili. (ecb/PIA7-Bohol).