13 lang sa 56 ka kaso sa COVID-19 

sa Bohol ang local transmission

TAGBILARAN CITY, Bohol, Dec. 15 (PIA) -- Daku na kaayo og deperensya ang 56 ka kaso sa coronavirus disease (COVID) karon kon itandi sa unang adlaw sa Disyembre kanus-a may natala nga 154 ka kaso sasakit nga mananakod. 

Bisan pa niini, padayon nga nanawagan sa pagtamud sa health protocols ug minimum health standards ang Bohol Inter-Agency Task Force on Management of Emerging Infectious Diseases (BIAFT) pinaagi sa iyang tigpamaba nga si Dr. Cesar Tomas Lopez.

Sa iyang inadlaw nga presser didto sa Kapitolyo Dec 14, si Dr. Lopez gani miuna sa pagpahinumdom nga sa nagkaduol nga adlaw sa Pasko, sa mga nagsingabut nga mga adlaw sa pagsalusalo, pagpamalit og mga gasa ug pinaskohan, maglikay gyud sa dagsang sa mga tawo, pagsalmot sa mga salusalo nga gisawhan sa mga dili kauban sa balay, ug sa pagpakig-uban sa daghang mga tawo didto sa mga lugar nga sirado.

Kini samtang 13 na lamang ka kaso sa local transmission ang natala sa Bohol sa unang adlaw sa Simbang Gabi o sa Misa de Gallo nga gipunsisokan na usab sa mga tawo.

Hinuon, ang 13 ka locally transmitted nga mga sako karon gitutokan na pag-ayo ug dupot nga gi- monitor, gi-obserbahan ug gipadayon ang contact tracing sa mga natumbok nga mga tawo nga ilang nakasahug sulod sa pipila ka adlaw sa wala pa sila matumbok nga nagpositibo sa sakit.

Sa 13 ka mga kaso nga local tansmission, kini naglakip sa duha ka residente sa Balilihan, duha sa Ubay, usa sa Sikatuna, usa sa Candijay, usa sa Carmen, usa ka Health Care worker (HCW) sa Carmen, usa sa Danao, usa sa Lila, usa sa Panglao, usa ka HCW sa Tagbilaran ug usa ka residente sa San Miguel.

Sa kinatibuk-an nga 56 ka kaso, 43 niini ang mga kaso sa COVID nga nadala sa mga nanguli nga Locally Stranded Individuals (LSI), Overseas Filipino Workers ug nga nanulod nga Authorized Persons outside Residence (APOR).

Dugang ni Dr Lopez nga ang tanang mga aktibong kaso nga natala sa Bohol, pulos sila mga walay gipakita nga timailhan sa sakit ug maayo ra ang lawas, mao nga anaa lamang sa ilag tagsa-tagsa ka mga isolation facilities sa kalungsuran.

Niini usab nga adlaw, gikataho sa BIATF nga ming-kabat na sa 712 ka mga Bol-anon ang kanhi may COVID nga nanga-ayo na. Kini, nagtumod sa 91% nga recovery rate sa Bohol bisan pa sa 16 na ka Bol-anon ang nabiktima sa COVID nga midangat gayud sa pagkamatay.

Milampus na usab ang Bohol sa pagdawat sa namauli nga 10,695 ka mga OFW.

Sa katapusan nga taho sa BIATF, 10, 004 na ka OFW ang nahibalik na sa kiliran sa ilang mga kabanay sa mga kabalayan, human nila nakompleto ang pugos nga 14 ka adlaw nga kwarantina, samtang may 641 pa ka OFW nga nagpadayon pang gilaming sa mga isolation facilities ug hotel quarantines.

Mikabat sa usab sa 34,419 ka mga LSI ang napapauli na, 29,841 niini ang nakakompleto na sa quarantine, samtang may 4,578 pa nga mahimong mohuman sa kwarantina human sa duha ka semana.

Sa kinatibuk-an nga kadaghanon, 10,177 na sa mga nakauli ang gikan sa District 1, 13,296 ang gikan sa District ug 10,946 na ang nakauli nga mga taga District 3.

Kasamtangan nga may 4,077 ka mga lugar kahigdann sa mga buot pang manguli sa Bohol apan may mga kalungsuran nga karon nagpa-undang pa sa ilang pagpanawat sa mga manguli-ay sa Pasko, segun usab sa pagtugot sa RIATF, segun pa ni Dr. Lopez. (rahc/PIA-7/Bohol)

NAGMAPASALAMATON. Nagmapasalamaton ang BIATF pinangulohan ni Gob Art Yap ngadto sa mga medical ug non medical frontliners sa padayon ug way pu-as niini nga serbisyo sa katawhan bisan pa nga gipahimutang na ang ilang kaugalingon sa kakauyaw nga matakdan sa sakit. (PIA Bohol) 

PADAYON SA PAGTAMUD SA PROTOCOLS. Kini maoy panawagan sa BIATF pinaagi ni Dr. Cesar Tomas Lopez sa unang adlaw sa Simbang Gabi nga gipunsisokan usab sa mga tawo, ug delikado sa pagtakod sa sakit. (rahc/PIA-7/Bohol FILE PHOTO)