Pakignegosasyon sa gobyerno sa mga COVID-19 

vaccine manufacturers, malamposon – Galvez 

TAGBILARAN CITY, Jan. 15 (PIA)--‘Very successful,’ matud pa ni National Task Force (NTF) Against COVID-19 chief implementer ug vaccine czar Kalihim Carlito Galvez ang nahimong pakignegosasyon sa gobyerno sa pito ka manufacturers sa COVID-19 vaccine. 

Sa gipahigayong Laging Handa briefing, miingon si Galvez nga nagpadayon ang maayo nilang pakigsabot sa mga vaccine makers, apan matud pa dili pa mahimong i-anunsyo kun naaprubahan ang kasabotan tungod kay kinahanglan unang magbaton og pinal nga konklusyon sa gipahigayon nilang negosasyon. 

Pasabot pa sa kalihim, giingong nag-request ang mga vaccine makers nga dili una i-anunsyo hangtod wala pa’y nalagdaang ‘term sheet’ tali sa duha ka habig. 

Apan giseguro ni Galvez nga positibo ug maayo ang dagan sa gihimo nilang pakig-estorya sa pito ka manufacturer nga gilangkoban sa Pfizer, Novovax, Johnson and Johnsons, Sinovac, Gamaleya, Moderna ug AstraZeneca. 

Pagbutyag pa ni Galvez, gipaabot nga mokabat sa 148 milyon nga bakuna ang makuha kanila sa nasod ug mahimo pang madugangan og 40 milyong bakuna gikan usab sa Covax. 

Sa kinatibuk-an, naa sa kapin 180 milyon ka doses sa bakuna ang gitakdang paliton sa Pilipinas gikan sa nagkalain-laing mga nasod. 

Pagseguro pa sa vaccine czar nga makasalig ang publiko nga ang Vaccine Cluster ug Vaccine Task Group andam na paghidangat sa Enero 30. Apil na niini ang training sa mga vaccinators ug apil na usab ang mobilization sa Armed Forces of the Philippine (AFP), Philippine National Police (PNP) ug sa tanang stakeholders, himuon sa gobyerno. (ecb/PIA7-Bohol) 

Sa Laging Handa Briefing niadtong Enero 13, giseguro ni vaccine czar Kalihim Carlito Galvez nga makasalig ang publiko nga ang Vaccine Cluster ug Vaccine Task Group andam na paghidangat sa Enero 30. Apil na niini ang training sa mga vaccinators ug apil na usab ang mobilization sa AFP, PNP ug sa tanang stakeholders, himuon sa gobyerno. (PIA)