Sinovac gitandi sa bakuna 

sa Moderna, Pfizer, Astra

TAGBILARAN CITY, Bohol, Jan. 26 (PIA) -- Samtang ang mga dagko ug inila nga mga kompanya sa kalibutan nagkamolo pa og tiwas sa katapusang hugna sa medical trials alang sa ilang bakuna batok sa corona virus disease (COVID-19), dagway og ang China, daku na og pagka abante sa ilang duha ka mga bakuna pinaagi sa Sinovac ug sa Sinopharm.

Unsa man ang kinaiya sa sa mga bakuna nga ginama sa China kon itandi sa mga bakuna nga mugna sa Russia, America, Britanya ug uban pang nasud nga nangandoy nga makahimo sa ilang kaugalingon nga bakuna batok sa sakit nga COVID?

Sebun sa pagpanuki-duki, ang Sinovac ginama sa usa ka biopharmaceutical company nga Sinovac nga nakabase sa Beijing kinsa maoy nagparehistro sa ilang bakuna nga gitawag og CoronaVac, bakuna nga migamit sa gipaluya nga kagaw sa SARS COV 2.

Ang kagaw nga patay na, ug dili na makatakod, maoy gigamit sa Sinovac aron may paon nga maoy dali makit-an dayun sa immune system sa lawas, apan wala nay ikasukol pa, mao nga dili na maka-ingon sa sakit.

Sa laing bahin, ang bakuna nga Moderna ug sa Pfizer BioNTech nga gihimo sa Amerika migamit sa teknolohiya sa messenger RNA (mRNA) sa ilang bakuna.

Pinaagi sa messenger RNA, kini ang magbitbit sa genetic code sa coronavirus sa higayon nga itupok kini sa lawas.

Ang mensahe nga nakasuwat sa RNA mao ang mandu nga magsugo sa paghimo sa antibodies nga may mga viral proteins, aron dili na kinahanglan pa nga sudlan pa og mismo kagaw o parte sa kagaw nga maoy itupok, aron mabansay ang immune system sa lawas sa pag-asdang sa kagaw nga mosulod.

Ang pamaagi sa Coronavac subay sa kinaraang paagi sa paghimo og bakuna nga una na nga malampusong gigamit sa kapid-an na nga panahon, sama sa bakuna sa rabies, polio.

Sa laing bahin, ang "mRNA vaccines bag-ong matang sa bakuna ug wala pay malampusong ehemplo nga masulti niining bag-ong teknolohiya, ilabi na sa epekto niini sa mga katawhan.

Samtang ang mga bahuna nga mitumaw karon, gipadali aron may dinali-an nga magamit, kini silang tanan kinahanglang mosubay sa tulo ka hugna nga medical testing.

Samtang nagpadayun ang ikatulo ug katapusang hugna sa mga testing sa kasagarang bakuna, wala pa man makita ang epekto niini, gipagawasan na kini sa mga gobernor sa Emergency Use Authorization aron madapat na kini.

Ang ikatulo nga hugna sa pagtesting sa mga bakuna mogamit sa labing menos 30 mil ka mga tawo sa nagkadaiyang edad, lugar, kahimtang sa lawas ug sex aron ilhon ang epekto niini alang sa tanan.

Segun sa mga dokumento sa unang mga medical testing sa Sinovac, mahimo ang bakuna nga tipigan sa ordinary nga refrigerator sa 2-8 degrees Celsius, sama sa bakuna sa AstraZeneca nga migamit sa genetically engineered nga kagaw nga maog kinaingnan sa sip-on aron maoy sakyan sa timailhan sa COVID.

Ang bakuna sa Moderna magkinahanglan nga tipigan sa -20 degrees Celsius samtang ang bakuna sa Pfizer tipigan sa -70 degrees Celsius.

Niini, ang bakuna sa Sinovac ug ang sa Oxford-AstraZeneca mas sayun nga magamit sa mga pobre nga nasud ilabi na niadtong nakumalisud sa pagpalit sa mga freezers nga sudlan sa daghang mga bakuna.

Labing lisud usab sa mga modeno nga bakuna ang pagpadala niini sa mga lagyo nga lugar, aron ikapanghatag didto, kon itandi sa uban nga mga bakuna. (rahc/PIA-7/Bohol)