WHO may sugyot kon kinsa ra’y 

bakunahan sa Pfizer BioNTech

TAGBILARAN CITY, Bohol, Jan. 26 (PIA) -- Luwas ug epektibo man ang balkuna nga hinimo sa Pfizer-BioNTech nga gitawag og COVID-19 mRNA vaccine, adunay pipila ka pudyot sa populasyon nga wala lkaayo irekomendar nga ganiton ang nasampit nga bakuna.

Kini maoy pasiunang pahimangno sa World Health Organization (WHO) Strategic Advisory Group of Experts (SAGE) on Immunization, dungan sa pagpabuhagay na sa labing una nga bakuna batok sa Corona virus 19 (COVID-19) nga nakakuha sa Emergency Use Authorization.

Segun sa SAGE, kining pudyot sa populasyon naglakip sa mga tawo nga may nasinati na nga grabe nga allergies, kasagaran nga mga buntis, kadtong magtaboktabok sa mga nasud nga dili lakip sa mga pundok nga unang gitagan-an sa bakuna, ug mga menor de edad ilabi na ang ubos sa 16 anyos.

Segun pa sa SAGE, wala irekomendar kanila ang bakuna, tungod sa contraindications, kakuwang sa supply pa sa bakuna ug ang kakuwang sa datus kabahin niini.

Segun sa WHO, gihatagan og prayoridad sa bakuna ang mga health workers kinsa naa sa labing taas nga kakuyaw tungod sa ilang pagpakigsahug sa mga may sakit, sundan sa mga mas taas nag edad nga mga hingkod, sa dili pa ang bakuna ipatupok sa nahibiling kadaghanan sa populasyon.

Butyag sa WHO, ang mga tawo nga nakasinati na og grabe nga pagka-allergy ilabi na sa bisan haim man nga sahug sa bakunang nahisgutan, kinahanglang dili na magpatupok niining nahinganlan nga bakuna.

Sa kaso sa mga buntis bisan anaa sila sa mas taas nga risgo sa grabe nga COVID-19 kon itandi sa mga dili buros, ang COVID-19 gitumbok na nga usa sa mga hinungdan sa delikado ug wala sa saktong siyam ka buwan nga pagpanganak.

Hinuon, miangkon ang SAGE nga tungod sa kakuwang sa kasayuran, ang WHO wala na lang magrekomendar sa pagpabakuna sa mga bunti niining higayona.

Kon hinuon ang buntis adunay mas taas nga risgo nga matakdan, ang pagpabakuna depende sa konsiderasyon sa mga hingtungdan, aghat sa WHO.

Sa mga nagpasuso, kon siya lakip sa mga may prayoridad sa bakuna, dini na kinahanglan pa nga mounding sa pagpasuso kon mabakunahan na.

Dugang sa SAGE, ang natumbok nga bakuna nasuwayan lamang sa mga bata nga labaw sa 16 ang edad ug wala sa mas ubos nga edad, mao nga wala pay kasaligan nga datus kon unsa man ang epekto niining nasampit nga bakuna sa mga bata nga ubos sa 16 anyos.

Mao nga sugyot sa WHO SAGE, bisan kon ang bata lakip sa mga anaa sa kakuyaw nga matakdan, wala irekomenda sa WHO ang pagpabakuna

Hinuon, ang bakuna sa Pfizer BioNTech, nasayran na nga epektibo bisan sa may sakit sama sa hypertension, diabetes, hubak, sakit sa bag, sakit sa atay o bato, lakip na ang mga chronic infections that.

Sa mga tawo nga may suliran na sa immune systems, wala pa usab igong datus kon maayo ba ang bakuna alang kanila, mao nga kon bakunahan man, kinahanglang kini sila katambagan una sa dili pa patupokan. (rahc/PIA]7/Bohol)

DILI TANANG BAKUNA MAGAMIT SA TANAN. May mga matang sa bakuna nga wala matun-i kon unsay epekto sa bisan kinsa nga mga pudyot sa katilingban sama sa kabataan, mga may sakit, mga edaran, mga naguba na ang immune system, mga may allergies. Hinuon, gipasabut sa WHO nga mahimong dili tanan ang angay bakunahan, apan kinahanglang ubay-ubay gyud sa populasyon aron dili na makakita og laing tawo nga katabokan ang kagaw aron makapanakod sa mga wala mabakunahi. (PIA Bohol)