DOH ngadto sa LGUs:

Mga lakang batok COVID-19, hingosgan pa

TAGBILARAN CITY, Feb. 22 (PIA)--Gi-awhag sa Department of Health (DOH) ang tanang local government units (LGUs) nga hingosgan pa ang mga lakang batok sa COVID-19.

Kining awhag ni DOH Usec. Maria Rosario Vergeire gihimo tungod na usab sa posibleng pagpaluag sa gobyerno sa quarantine sa tibuok nasod ngadto sa modified general community quarantine sugod sa Marso 1.

Matud pa ni Vergeire, bisan magluag na sa nagkalain-laing sektor, angay masiguro nga mabantayan nga dili na mosaka pa ang kaso sa COVID-19.

Gipasabot pa ni Vergeire nga bisan unsang restrictions o risk classification ang ipatuman, ang mahinungdanon, adunay katakos ang LGUs nga mohimo og mga lakang o pagtubag.

Sigun pa kang Vergeire, gihatagan sa Inter-Agency Task Force (IATF) og otoridad ang mga LGU sa pagpatuman og localized lockdowns sa higayong may pagsaka sa kaso sa ilang nasakupan.

Giingong kinahanglan usab nga hingosgan ang ilang mga surveillance, contact tracing, testing, isolation ug treatment.

Kalabot niini, nagpahinumdom si Vergeire sa publiko nga dili mahimong kampante bisan pa ang tibuok nasud gibutang na sa mas ubos nga matang sa community quarantine.

Matud pa nga angay mosunod sa gipatuman nga health ug safety protocols ug minimum public health standards. (ecb/PIA7-Bohol)