DOH, nipasidaan sa mga mameke

og resulta sa COVID-19 test

TAGBILARAN CITY, Feb. 4 (PIA)--Subling gipasidan-an sa Department of Health (DOH) ang bisan kinsang malambigit sa pagpeke sa resulta sa COVID-19 test.

Taliwala na usab kini sa taho nga pipila ka mga clinic ug indibidwal ang gi-peke ang ilang polymerase chain reaction test results aron makabyahe sa ubang lugar sa nasod.

Matud pa sa gipagawas nga pahayag sa DOH, ang pagpeke sa COVID-19 test results paglapas sa Republic Act 11332 ug ang bisan kinsang mapamatud-ang naghimo niini pamultahon og P20,000 hangtod P50,000 o pagkabilanggo og usa hangtod unom ka buwan.

Aron masiguro kun lisensyado ang usa ka laboratoryong magpahigayon sa COVID-19 PCR testing, gitambagan sa DOH ang publiko sa pagbisita sa DOH website https://hfsrb.doh.gov.ph/1729-2/ aron makita ang kumpletong listahan sa mga lisensyadong COVID-19 testing laboratories.

Mahimong i-check usab ang listahan sa mga COVID-19 licensed testing laboratories sa BEAT COVID-19 Situational Report nga gi-upload sa ilang official Facebook page nga https://www.facebook.com/OfficialDOHgov/.

Mo-konsulta sa mga local health centers ug regional epidemiology ang surveillance units health care provider kun kinahanglan nilang magpa-test ug mangayo og kopya sa lisensya sa COVID-19 RT-PCR testing nga valid hangtod ika-31 sa Disyembre 2021.

Samtang giklaro usab sa DOH nga dili tanang diagnostic laboratory lisensyadong magpahigayon og PCR COVID-19 testing. (ecb/PIA7-Bohol)

Nipasidaan ang DOH sa bisan kinsang malambigit sa pagpeke sa resulta sa COVID-19 test taliwala sa taho nga pipila ka mga clinic ug indibidwal ang gi-peke ang ilang polymerase chain reaction test results aron makabyahe sa ubang lugar sa nasod. (DOH/ PIA7-Bohol)