Hapsay nga distribusyon sa COVID-19 vaccines,

gipasiguro ni PRRD sa mga ahensya sa gobyerno

 

MANILA, Feb. 9 (PIA)--Gimanduan ni Presidente Rodrigo Roa Duterte ang mga kawani sa gobyerno nga seguradohong hapsay ang paghatod sa mga coronavirus disease 2019 (COVID-19) vaccines kun moabot na kini sa nasod.

 

Atol sa gipahigayong Inter-Agency Task Force for the Management of Emerging Infectious Diseases (IATF-EID) Meeting sa Malakanyang niadtong Pebrero 8, gitumbok ni PRRD nga dili angay buksan sa Bureau of Customs (BOC) ang mga containers sa mga bakuna.

 

Gidugang pa sa Presidente nga angay mohatag ang  Philippine National Police (PNP) og mga escorts aron maseguro nga paspas nga mahatod ang mga bakuna sa mga storage facilities.

 

“Ang trabaho ninyo Customs is magtingin. You have no business na buksan yan. I am not allowing anybody there sa airport na magbukas,” matud pa ni PRRD.

 

Samtang gisugdan na ang simulation exercise sa gobyerno kalabot sa vaccination rollout.

 

Kini isip pagpangandam sa gobyerno sa nagkaduol nga pag-abot sa nasod sa unang batch sa bakuna batok COVID-19.

 

Gisugdan ang maong simulation exercise sa pag-abot sa mga bakuna sa Ninoy Aquino International Airport (NAIA) Terminal 2 diin didto moagi ang mga bakuna sa Customs clearance.

 

Human niini, ibutang dayon ang mga bakuna sa mga sakyanang magdala niini sa Research Institute for Tropical Medicine (RITM).

 

Gawas pa niini, apil usab sa ipahigayong simulation ang pagbalhin sa mga bakuna sa storage facilities sa nasod sa dili pa kini padayong gamiton. (ecb/PIA7-Bohol)

Sa gipahigayong Inter-Agency Task Force for the Management of Emerging Infectious Diseases (IATF-EID) meeting sa Malakanyang niadtong Pebrero 8, gimanduan ni Presidente Duterte ang mga kawani sa gobyerno nga seguradohong hapsay ang paghatod sa mga COVID-19 vaccines kun moabot na kini sa nasod. (PCOO)