Pamugas nangayo’g dispensa sa mga 

wala makasulod sa Ubi Festival

TAGBILARAN CITY, Bohol, Jan. 29 (PIA) -- Personal nga nangayo og dispensa ang usa sa mga nagpasiugda sa tinuig nga Ubi Festival, sa ilang hugot nga pagpatuman sa curfew sa mga senior citizens ug menor de edad, kinsa gi balibaran sa pagsulod sa festival sa mga adlaw nga dili sila angay nga makagawas.

Didto sa dungan nga sibya sa Kapihan sa PIA ug sa Radyo Serbisyo Panguma, si Assistant Provincial Agriculturist Larry Pamugas mapaubsanon nga nangayo og dispensa sa mga senior citizens, kinsa diha na unta mitambong sa festival apan wala pasudla tungod kay dili sila angayan nga mogawas nianang mga adlawa.

Kahinumduman nga subay sa mga lagda batok sa Corona virus (COVID), gipatuman sa Bohol pinaagi sa Executive Order No. 16 ang provincewide curfew sa mga senior citizens ug minors, lakang nga gi-amendahan lamang usab sa Executive Order No. 52 ug EO 52-A.

Sa rason nga ang mga batan-on askil kayo ug may daku nga purohan nga mas daling matakdan, ug nga ang mga edaran, hinay nag panalipod sa lawas, gipatuman ang mandu sa gobbernador.

Human sa pipila ka semana, nahukman na usab nga mahimong makagawas kadtong mga unos sa 15 ug mga edaran lapas sa 65 sa tulo ka adlaw sa matag semana.

Wala usab magdugay, gipagawas sa Kapitolyo ang Executive Order No. 52-A nga nagmandu sa mga menor de edad ubos sa 15 anyos nga tugotan na sa paggawas gikans a alas 6:00 sa buntag ngadto sa alas 6:00 sa hapon apan inubanan sa mga ginikanan ug magbalantay, sa mga adlaw nga Biyernes, Sabado ug Domingo.

Sa mga edaran na o kadtong minglapas na sa 65, makagawas sila sa ilang mga panimalay sa adlaw nga mga adlaw nga Miyerkoles, Huwebes ug Domingo.

Apan sa opisyal nga pagbukas sa ika 21 nga Ubi Festival niadtong Enero 25, Lunes, tataw nga dili kadto adlaw nga tinggawas sa mga senior citizens.

Si Pamugas, kinsa sakop sa UbiFestival Technical Working Group, nanghangyo og pasaylo sa mga nabalibaran, sanglit usab us aka tuyo sa UbiFestival ang pagpanalipod sa mga motambong nga dili matakdan sa sakit.

Hinuon, iyang gipasabut pag-usab nga ang UbiFestival karong tuiga, taas ang lanat sa pagpamaligya nga moabut pa ngadto sa sunod buwan, hinungdan nga mahimo pa nga dili magpunsisok ang mga tawo pagsubay ngadto.

Sa una nga higayon usab, gihimo ang UbiFestival sa biniyaan nga daan nga airport sa Tagbilaran, subay sa rason nga magkinahanglan ang mga tigpasiugda sa mas lapad nga lugar aron ikapatuman ang social distancing.

Hangyo sa Assistant Provincial Agriculturist, bisan sa Festival, magtamud pa gihapon sa mga lagda sa luwas nga pagsuroy niining panahon sa pandemya. (rahc/PIA-7/Bohol)

PAGPANALIPOD LANG GAYUD. Gipasabut ni Assistant Provincial Agriculture Laay Pamugas nga ang ilang paghugot sa mga saktong edad nga makasulod sa Ubi Festival aron dili makatabaok ang kagaw. (PIA Bohol)

UBE FESTIVAL. Sanglit ang pagpangubihan mahimong apilan sa mga kabatan-onan ug may edad na, gipaneguro sa mga tigpasiugda nga subay gihapon sila sa katayan sa maayo ug luwas nga bansay batok sa sakit. (PIA Bohol)