27 ka Bol-anon namatay sa 

COVID; Lima niini, sa Marso

TAGBILARAN CITY, Bohol March 29 (PIA) -- Sa 27 ka kaso kamatayon sa mga Bol-anon kang kinsang kinabuhi gikalas ngadto sa Coronavirus disease (COVID), lima niini ang nahitabo sa buwan sa Marso.

Kini nagrepresentar sa 18% sa tanang kaso sa kamatayon sa COVID dinhi sa Bohol ug sa mas makahadlok nga nagsaka nga kaso sa pagtakod dinhi sa tibuok lalawigan.

Kahinumduman nga gipabati sa mga local nga opisyal sa Bohol ngadto sa katawhan ang ka delikado sa Coronavirus disease, diha nga mihukom kini nga sirad-an una ang Bohol sa mga buot mosulod sa isla niadtong Marso 16, 2020.

Nanagana ang mga opisyales nga ang mga manulod ug manguli sa Bohol, mao na unya ang makadala sa sakit sulod nganhi, niadtong panahona. DILI 

Human sa usa ka tuig nga pagpaningkamot nga dili makapanakod sa daghang Bol-anon ang sakit nga nakasulod gyud sa Bohol, gitiman-an ang kasumaran sa pagsira niadtong Marso 16, sa 22 ka kaso sa kamatayon sa COVID sa unang tuig niini.

Sa tibuok tuig, may average sa Bohol nga dul-an sa duha ka Bol-anon ang makalas sa matag buwan, kini samtang daghan pa ang wala makasagap sa balita ug sa kamangtas sa kagaw nga kina-ingnan sa sakit.

Human sa usa ka tuig ug human nagtuo ang mga Bol-anon nga may igo na silang kahibaw kabahin sa sakit, misiaw na dayun ang lima ka kamatayon sa usa lamang ka buwan,

Gikan sa ika 22 nga Bol-anon nga natala nga namatay dala sa nahisgutan nga sakit niadtong katapusang semana sa Pebrero, natala ang ika 23 nga kaso sa COVID sa Bohol niadtong Marso 5, 2020, usa ka babaye nga taga Maribojoc ug may edad na.

Taas-taas ang lanat nga panahon dihang nahitabo ang ika 24 nga kaso, ang labing una nga Badjao nga gikataho nga nabiktima sa COVID, taga Dauis, niadtong Marso 20.

Usa ka adlaw ang minglabay, lain na usab ang nakabsan sa kinabuhi dala sa nahisgutang sakit. Hinuon, wala pay detalye kabahin sa maong pagkamatay sa ika 25 nga kaso sa kamatayon sa COVID ang gipagawas sa mga tinugyanan.

Upat ka adlaw ang minglabay human niadto, natala na usab sa Bohol ang duha ka kamatayon: ang kaso sa ika 26 nga namatay mao ang 64 anyos nga lalaki nga taga Tagbilaran.

Sa susama nga adlaw, natala na usab ang ika 27 nga kaso, ug kini mao ang usa ka 34 anyos nga lalaki nga gikan sa Bohol District Jail apan dili didto niya makuha ang kagaw sa sulod sa bilangguan. (rahc/PIA-7/Bohol)

NAGSALIG SA BAKUNA? Human unang gikataho ang pag-abot sa bakuna dinhi sa Bohol, lima na ka Bol-anon ang natakdan sa sakit ug gibawi-an sa hinuwaman nga kinabuhi. Kini usab nagpatin-aw lamang unsa ka mahinungdanon ang pag-amping gihapon bisan pag mabakunahan na. (PIA)

KAPANGHAMBOG. Bisan kon bakunado na ug nagsalig kay duol sa tambal kay medical frontliner, sayud ang mga health care workers sa kakuyaw sa ilang gitrabaho-an, hinungdan nga may face masks ug face shilds pa gihapon bisag bakunado na. Ang uban sa gawas, wala pay face masks, modurot pa gyud sa ubang tawo nga dili nila kaila. (PIA)