Face mask alisdan dayon, di ibuwad

sa adlaw ug gamiton og balik – DOH

TAGBILARAN CITY, March 25 (PIA)--Wala pa’y ebidensyang makapamatuod nga ang pagbuwad sa face mask sa adlaw makapatay sa coronavirus.

Kini ang pahayag ni Department of Health (DOH) Undersecretary Maria Rosario Vergeire sa giingon nga paggamit og balik sa mga surgical mask human kini ibuwad sa adlaw aron kuno mamatay ang virus.

“Wala pang ebidensya na nakakapagbigay sa atin kung ito ba ay naapektuhan ng weather, kung malamig o mainit… kung direct sunlight o hindi”, matud pa ni Vergeire.

“Ito pong praktis natin na nagbibilad sa araw… direct sunlight kasi po ang ibang organismo talaga sa direct sunlight namamatay pero dito sa COVID-19, itong SARS-CoV virus hanggang sa ngayon wala pa tayong ebidensya for that”, dugang pa niini.

Giklaro usab ni Vergeire nga ang mga medical grade o surgical mask mga disposable mask ug kun nabasa o nabulingan na, kinahanglan nang alisdan.

Matud pa nga bisan wala pa matapos ang adlaw kung mabasa o mabuling ang face mask, kinahanglan na kining alisdan tungod kay basin makatakod pa kun balik-balikon og gamit.

Giingong mas maayong mogamit na lamang og “cloth mask” tunod kay mahimo man kining labhan ug magamit og balik.

Nipahinumdom usab si Vergeire nga mahinungdanong batasanon nga may suot nga facemask ug face shield ug tarongon og suot aron maproteksyunan batok sa virus. (ecb/PIA7-Bohol)

WALA PAY PAGTUON. Wala pay nagtuon kon mamatay ba gayud ang kagaw kon ibuwad sa adlaw ang ginamit nga face masks, mao nga dili gyud nato sugalan ang naghimo niini, pasabut ni DOH Usec Vergierre. (PIA Bohol)