“Magpabakuna ta” – panawagan sa Panglao SK

Federation President ngadto sa mga kabataan

 

PANGLAO, Mar. 5 (PIA)--Nanawagan si Panglao SK Federation President Jonah Loretero sa pareho niyang mga kabataan nga magpabakuna ug makigtinabangay.

 

“Sa aking mga ka-youth in the municipality of Panglao, I am encouraging everyone to get vaccinated and also magtulungan upang masolusyonan ang mga pangangailangan lalo na ngayong pandemya,” matud pa ni Loretero sa programang Laging Handa Network Briefing sa Presidential Communications Operations Office (PCOO) niadtong Marso 3.

 

Matud pa sa Panglao SK Federation President nga gipaabot na sa mga kabataan sa ilang lungsod ang bakuna tungod kay nagtuo sila nga importante kini aron mabalik na sa normal.

 

“Importante ang bakuna, lalo na ang Municipality of Panglao is mainly a tourism industry. Last year pa namin hinihintay ang bakuna upang mabalik na sa normal ang pangkabuhayan at ang kabataan ay makabalik na sa face-to-face class,” matud pa ni Loretero.

 

Giingong manguna mismo si Loretero sa pagpabakuna aron makadani usab sa mga susama niyang mga kabataan.

 

Kalabot niini, gihisgotan usab sa maong programa ni Loretero ang mga programa nila sa Pederasyon sa Sangguniang Kabataan sa lungsod sa Panglao taliwala sa pandemyang COVID-19.

 

Partikular nga gihisgotan niini ang paghimo sa mga kabataan sa ilang lungsod og mga  face masks diin gipanghatag kini isip tabang sa mga lumolopyo sa maong lungsod.

 

Matud pa nga usa  kini ka long-term project kauban sa SK Municipal Federation ug Women’s Federation. Gipanghatag ang maong mga face pinaagi sa mga barangay captain sa ilang nagkadaiyang barangay. (ecb/PIA7-Bohol)

Sa programang Laging Handa Network Briefing sa PCOO niadtong Marso 3, 2021, nanawagan si Panglao SK Federation President Jonah Loretero sa pareho niyang mga kabataan nga magpabakuna ug makigtinabangay aron masolusyonan ang mga panginahanglan ilabi na karong may pandemyang COVID-19. (PCOO/PIA)