922,000 kapin ka indibidwal

nabakunahan na batok COVID-19

TAGBILARAN CITY, April 8 (PIA)--Nikabat na sa 922,898 ka indibidwal ang nabakunahan batok sa COVID-19 hangtod niadtong Martes, Abril 6, matud pa sa datos nga gipagawas sa Department of Health (DOH).

Sa maong gidaghanon, 64% o 872,213 ang nakadawat sa unang dose samtang 3.7% o 50,685 ang nakakumpleto na sa duha ka dosage.

Gawas niini, nakapatukod na usab og 2,670 ka vaccination sites tabok tibuok nasod aron ibakuna ang gipakatap nga 1,936,600 ka doses. Katumbas kini sa 77% sa 2,525,600 ka shots nga na-deliver sa nasod.

May pipila ka lokal nga kagamhanan ang gihunong kadali ang pagbakuna tungod sa kakulang sa AstraZeneca vaccines.

Giseguro sa gobyerno nga papaspasan pa ang pag-angkat ug distribusyon sa COVID-19 vaccines.

Taliwala kini sa padayon nga pagsaka sa kaso sa COVID-19 sa nasod nga nagsugod sa wala pa natapos ang buwan sa Marso.

“The NTF and the DOH assure the public that vaccination is FREE and calls on senior citizens and persons with comorbidities to receive the available vaccines and acquire the added protection it provides,” matud pa sa pahayag sa National Task Force ug sa DOH.

Sa pagkakaron, gi-aprobahan na sa Food and Drug Administration (FDA) ang paggamit sa Sinovac alang sa mga senior citizen. (ecb/PIA7-Bohol)

Gipagawas sa DOH ang vaccination statistics sa Pilipinas sukad niadtong Abril 6, 2021. (PIA)