DOLE-7 mopasiugda'g 

virtual job fair Mayo 1

TAGBILARAN CITY, Bohol, April 30 (PIA) -- Mahimo'ng makasignit og trabaho kadtong mga nangita pag kasudlan, kini samtang ang Department of Labor and Employment (DOLE) sa Rehiyon 7 magpasiugda ug maghimo sa virtual job fair sa Adlaw sa mga Mamumuo.

Gitawag nga 2021 National Online Trabaho, Negosyo, Kabuhayan (TNK) Job and Business Fairs, ang kalihukan maoy highlight sa pagtimaan sa National Labor Day, samtang nagtanyag sa trabaho sa mga nangita pa, bisan kon kini sila, anaa ra sa ilang tagsatagsa ka mga balay.

Ug kay TNK man, dili lamang trabaho kon dili lakip na usab ang Kapanginabuhi-an ug Negosyo ang ihanyag sa mga ahensya nga nakigtambayayong sa DOLE alang sa kalihukan.

Naa didto sa job fair ang DOLE, Philippine Overseas Employment Administration, Technical Education and Skills Development Authority, ang mga local nga kagamhanan pinaagi sa ilang Public Employment Placement Offices, mga kaabag sa industriya nga magtutok sa hanyag sa trabaho samtang may magtotuk usab sa negosyo ug panginabuhian.

Ang Department of Trade and Industry (DTI) pananglit maoy maghatag ubos sa ilang Negosyo nga serbisyo, sa: Advocacy for entrepreneurship; Business opportunities; Government support ug assistance pagsugod sa negosyo, business registration, e-commerce; ug SMEs support pinaagi sa business advisory ug counseling.

Didto sa jobs fair, may mga links alang sa webinars sa pagsugod og negosyo, pagkat-on sa negosyo aron makahatag sa nga mangita pag trabaho sa mas lapad nga kapili-an ug dili lang sweldo ang basehan. Ang TESDA, usab magtanyag sa ilang skills training enhancement.

Anaa usab didto ang virtual Help Desk, adbokasya sa panginabuhi-an, pagpanghatag og starter kits sa NRCO, OWWA ug ubang ahensya nga nakigtambabayong.

Sumala pa sa Technical Support Services Division-Employment Workers’ Welfare (TSSD-EWW) OIC, nga si Ma. Teresa D. Tanquiamco, kadtong mga aplikante nga may laing nga suliran sa ubang ahensya, sumpayon sila pinaagi sa links sa DOLE, nagdto sa ahensya nga makatabang kanila.

Segun sa DOLE, ikauban nila sa ilang buksan nga main portal Mayo 1 ang One-Stop-Shop Services: sa NBI alang sa Clearance ug ubang serbisyo, PSA (Birth Certificate issuance ug ubang serbisyo); BIR (TIN issuance ug ubang serbisyo; SSS (SSS Number issuance ug ubang serbisyo); PAG-IBIG (pagproseso sa application, ug pagpanghatag); Philhealth (Phil Health application), PRC (adbokasya sa PRC Licensure Examination System, pagproseso sa Board exams, ug resulta sa Board Exams).

Adto usab ang Phil. Postal Corp. (pagproseso sa application ug issuance sa Postal IDs, ang DFA sa pagproseso sa application alang sa passport); u gang POEA (alang sa Tele-consultations kabahin sa overseas employment pinaagi sa email sa legalassistance.poea@gmail.com).

Agi og pagpalapad sa tanyag sa TNK Job ug Business Fairs, si DOLE-7 Regional Director Salome O. Siaton nagpadayag nga ang online Job Fair gilantaw nga makaalagad dili lamang sa panginahanglan sa kapanarbaho-an apan usab sa nanginahanglan sa nansaybansay sa katakus, pagtambag sa negosyo ug pagpanghatag og dugang kapanginabuhi-an.

Dugang niya, ang online job fair ug nga serbisyo niini kabahin sa stratehiya sa kagamhanan ubos sa National Employment Recovery Strategy (NERS) aron makapadagan og balik sa kalihikang ekonomikanhon, makapasugod sa trabaho, magtanyag og tabang sa patigayon ug ipabalik ang kmpyansa sa pagpangnegosyo.

Ang mga employers nga interesado, kinahanglang morehistro sa www.mynimo.com/dole7employers ug magpadalag apil sa mga rekisitos ngadto sa http://bit.ly/2021LaborDayTNK.

Alang sa dugang pangutana sa virtual job fair, ipaagi sa (032) 234-3318 DOLE. (rahc/PIA-7/Bohol)