PhilHealth nanawagan sa publiko nga i-report

ang mga kaso sa upcasing, health insurance abuse

TAGBILARAN CITY, April 13 (PIA)--Nanawagan ang Philippine Health Insurance Corporation (PhilHealth) sa publiko nga ipahibalo sa ilang buhatan ang bisan unsang kaso sa upcasing o bisan unsang matang sa health insurance abuse.

Gihimo sa ahensya ang panawagan tungod na usab sa mga nanggawas nga mga video posts diin pipila ka health care providers ang makitang nakiglalis sa mga pasyente aron i-deklarar ang minor respiratory symptoms, sama sa asthma, isip coronavirus disease (COVID-19) aron makakuha og mas taas nga benefits.

Sa usa ka pahayah, nanawagan ang PhilHealth sa mga nag-post sa videos nga magpakita og ibedensya ug makig-alayon sa ilang ahensya aron imbistigahan kini.

Sa higayon nga mapamatud-ang tinuod ang mga alegasyon, giseguro sa PhilHealth nga manubag ang bisan kinsang nagpaluyo niining hiwi nga binuhatan.

Gipasabot sa PhilHealth nga ang upcasing nagtumbok sa bisan unsang matang sa health insurance fraud nga may silot nga mokabat sa P200,000 nga multa sa matag numero o suspensyon sa kontrata sa health care provider nga mokabat og hangtod tulo ka tuig.

Matud pa nga nagtumbok usab kini sa criminal violation nga may silot nga pagkabilanggo gikan unom ka buwan ug usa ka adlaw hangtod unom ka tuig base sa mahimong desisyon sa korte agi og pagsunod sa Section 38 sa Universal Health Care Law.

Nagpahinumdom usab ang PhilHealth sa publiko nga responsibilidad sa matag miyembro niini ang panalipdan ang pondo sa ahensya.

Nanawagan usab ang buhatan sa bisan kinsang may gigunitang credible information sa pag-report dayon niini sa PhilHealth lakip ang mga ebidensya nga magduot sa maong hiwi nga binuhatan. (ecb/PIA7-Bohol)