Pipila pa ka semana pa makuha ang 

proteksyon human mabakunahan

CORTES, Bohol, May 4 (PIA) -- Dili dayon makuha sa lawas ang panalipod nga gisaad sa mga bakuna, mao nga kinahanglan pa gihapon nga magpadayon sa pagtuman sa minimum health protocols hangtud sa pipila ka semana nga mokuha na sa lawas ang gisaad nga proteksyon.

Kini maoy gipasabut ni Dr. Fruserma Mary Uy, sa milabay'ng Kapihan sa PIA.

Si Dr Uy, kinsa maoy facility Chief sa Provincial Isolation Facility sa Bohol alang sa masakit sa coronavirus disease (COVID), mibutyag nga magkinahanglan pa ang lawas og duha ka semana human makuha ang ikaduha nga tupokan sa bakuna nga Sinovac, ug mahimong mas taas pa nga panahon ang kinahanglan sa nakadawat sa AstraZeneca, hangtud nga ang lawas makakuha na sa kinatibuk-ang proteksyon.

"Tungod niini, atong aghaton ang atong mga katawhan nga nabalunahan na, sa pagpadayon sa pagsuot sa face mask, face shield, pagpanghunaw ug maghimo sa pagpamatay kagaw kanunay, likayan pa gihapon ang mga lugar nga naghuot ang mga tawo ug ipadayon ang us aka metros nga distansya sa labing duol nga tawo alang sa social distancing," palanog ni Dr. Uy.

Alang sa mga nabakunahan sa Sinovac, makuha ang ikaduha nga tupok sa bakuna human sa 28 ka adlaw o human sa 4 ka semana, mao nga upat usab ka semana gikan sa ikaduhang tupokan ang gikinahanglan aron makompleto ang gisaad nga panalipod sa nahisgutang bakuna.

Sa mga natupokan sa AstraZeneca alang sa unang dose, makuha ang ikaduhang tupokan human sa upat ngadto sa napulo ug duha ka semana.

Tungod usab niini, mahimong makompleto ang panalipod sa lawas human sa 4 ngadto sa 12 ka semana mahuman ang ikaduhang pagtupok sa bakuna nga gihisgutan.

Niining semanaha usab, nahidangat sa Pilipinas ang bakuna nga Sputnik nga hinimo sa Gamaleya Institute sa Russia.

Segun sa Department of Health (DOH), nakuha sa Sputnik ang Emergency use Authority dinhi sa Pilipinas niadtong Marso 19, 2021, ug kini nga bakuna, nasuwayan na nga matupok sa mga tawo, 18 anyos pataas, subay usab sa datus nga gitun-an sa Food and Drugs Administration sa nasud.

Sa mga mahatagan sa nahisgutang bakuna, kasagaran nga side effects mao ang pagsakit ug pamula sa dapit sa pagtupok, hilanat ug pangurog, labad sa ulo, panakit sa mga lutahan, arat nga tuutunlan, sip-on, ubo ug pagpnghatsi, segun sa DOH.

Sa makaykay nga kasayuran, walay seryoso ug lisud nga adverse reaction ang pagtupok sa bakuna, taho sa DOH.

Segun usab sa makuha nga kasayuran, ang Sputnik 91.6 posyento nga epektibo sa pasumpo sa simtomas sa COVID-19, human sa 21 ka adlaw gikan sa pagtupok sa bakuna.

Gani, human sa 21 ka adlaw o tulo ka semana gikan sa unang pagtupok, 100% kini nga mopugong batok sa kasarangan ug grabe nga kaso sa COVID-19, segun sa health department. (rahc/PIA-7/Bohol)

DILI PA DAYON MOEPEKTO. Matud ni Dr. Fruserma Mary Uy, modangat pa og 4 nagdto sa 12 ka semana ayha pa makuha sa lawas ang kinatinbuk-an nga proteksyon batok sa COVID mao nga kinahanglan ipadayon ang pagsunod sa minimum health protocols samtang nag-abag sa lawas aron makompleto ang proteksyon niini. (PIA Bohol)

VACCINE CZAR UG ANG RUSSIAN. Gisugat ni Philippine Vaccine Czar Carlito Galvez ang unang delivery sa Sputnik, ikaduhang bakuna nga gikan sa Russia nga nahidangat dinhi sa Pilipinas sa mianginga adlaw. (PIA)