Gob. Yap nakadawat na sa

unang dose sa CoronaVac

TAGBILARAN CITY, June 3 (PIA)--Nakadawat na si Bohol Gob. Arthur Yap sa iyang unang dose sa bakuna sa COVID-19 Huwebes sa buntag.

Si Yap gitupokan sa bakuna nga CoronaVac nga hinimo sa Chinese drugmaker Sinovac BioTech.

“Ganinang buntag sayo, nagpabakuna ko ug Sinovac isip pagpakita ug suporta alang sa atong padayong pagbakuna sa katawhan batok sa COVID-19. Dili kita angay nga mahadlok nga magpabakuna tungod dugang kini nga proteksyon sa atong kaugalingon batok sa COVID-19,” matud pa ni Yap sa Facebook post.

Si Ron Zapatos, usa ka nurse sa Gov. Celestino Gallares Memorial Hospital (GCGMH) ang ni-administer sa pagbakuna sa gobernador didto sa Bohol Provincial Diagnostic and Ambulatory Care Center, kanhi Bohol Medical Care Institute (BMCI) ning syudad sa Tagbilaran.

Ang pagbakuna sa gobernador gisaksihan nilang Provincial Health Office (PHO) officer-in-charge Dr. Cesar Tomas Lopez ug Giselle Quimpo, chief of staff ni Yap.

Kahinumdoman nga wala nagpabakuna si Yap sa unang vaccination rollout niadtong Marso tungod kay iyang gitamud ang priority list sa unang tupokan sama sa mga medical ug health frontliners sumala sa nasudnong lagda.

Hangtud nga ning bag-o lang, gitugot sa Inter-Agency Task Force ang pagbakuna sa mga lokal nga hepe ehekutibo sa nasud.

Sukad niadtong Hunyo 1, 2021, may 17,073 na ka indibidwal gikan sa 38,494 ang nabakunahan na sa Bohol sa Vaccination Team nga gipangunahan sa Provincial Health Office. (ecb/PIA7-Bohol)

Si Bohol Gob. Arthur Yap nakadawat sa unang dose sa CoronaVac niadtong Huwebes sa buntag, Hunyo 3, 2021 didto sa Bohol Provincial Diagnostic and Ambulatory Care Center, kanhi Bohol Medical Care Institute (BMCI) sa syudad sa Tagbilaran. (photo Art Yap Facebook)