Publiko gipasidan-an batok

sa mga pekeng PDEA agent

 

TAGBILARAN CITY, Feb. 22 (PIA)--Nipasidaan ang Philippine Drug Enforcement Agency (PDEA) sa publiko batok sa pipila ka indibidwal nga nagpaila isip ahente sa ahensya.

 

Kini human sa pagkamatay sa duha  ka suspek nga giingong nalambigit sa aktibidad nga kidnap for ransom sa nahitabong shootout sa Botolan, Zambales.

 

“The slain suspects reportedly belonged to the same group of men and women who wore PDEA uniforms rushing to arrest a man in Ususan, Taguig last February 4, 2018. The incident was caught in CCTV footage,” matud pa sa pahyag ni PDEA Director General Wilkins Villanueva.

 

Dili kini ang unang higayon nga gigamit ang uniporme sa PDEA alang sa ilegal nga aktibidad.

 

Base sa balaod, mapasakaan og kaso ubos sa Revised Penal Code ang dili awtorisadong pagsuot og uniporme o insignia sa PDEA.

 

Matud pa ni Villanueva nga ginasunod sa PDEA ang standard operating procedures sa pagpahigayon og mga lehitimong anti-drug operation.

 

“Our operations are always coordinated with the local police and the conduct of search operations are always armed with search warrants issued by court,” pahayag pa niini.

 

Gi-awhag sa PDEA Director ang publiko nga magbinantayon ug i-report dayon sa PDEA ang mga susamang insidente.

 

“I encourage the public to be vigilant and report to PDEA any similar incidents involving suspicious individuals masquerading as PDEA agents,” awhag pa ni Villanueva.

 

Mahimong ipaabot ang report pinaagi sa ‘Isumbong Mo Kay Wilkins!’ Facebook page o motawag o mo-text sa hotline numbers nga 09953547020 ug 09310278212. (ecb/PIA7-Bohol)

DOH ngadto sa LGUs:

Mga lakang batok COVID-19, hingosgan pa

TAGBILARAN CITY, Feb. 22 (PIA)--Gi-awhag sa Department of Health (DOH) ang tanang local government units (LGUs) nga hingosgan pa ang mga lakang batok sa COVID-19.

Kining awhag ni DOH Usec. Maria Rosario Vergeire gihimo tungod na usab sa posibleng pagpaluag sa gobyerno sa quarantine sa tibuok nasod ngadto sa modified general community quarantine sugod sa Marso 1.

Matud pa ni Vergeire, bisan magluag na sa nagkalain-laing sektor, angay masiguro nga mabantayan nga dili na mosaka pa ang kaso sa COVID-19.

Gipasabot pa ni Vergeire nga bisan unsang restrictions o risk classification ang ipatuman, ang mahinungdanon, adunay katakos ang LGUs nga mohimo og mga lakang o pagtubag.

Sigun pa kang Vergeire, gihatagan sa Inter-Agency Task Force (IATF) og otoridad ang mga LGU sa pagpatuman og localized lockdowns sa higayong may pagsaka sa kaso sa ilang nasakupan.

Giingong kinahanglan usab nga hingosgan ang ilang mga surveillance, contact tracing, testing, isolation ug treatment.

Kalabot niini, nagpahinumdom si Vergeire sa publiko nga dili mahimong kampante bisan pa ang tibuok nasud gibutang na sa mas ubos nga matang sa community quarantine.

Matud pa nga angay mosunod sa gipatuman nga health ug safety protocols ug minimum public health standards. (ecb/PIA7-Bohol)

Mga ‘Sano mahimong makadaug 

sa 'Balik sa Bohol' raffle prizes

CORTES, Bohol, Feb. 17 (PIA) – Bisan og Bol-anon nga mga paisano (sano), basta mopalit sa hotel accommodations ug tours sa mga establisemento nga miapil sa Balik sa Bohol Online sale gikan sa Pebrero 21 ngadto sa Marso 14, gawas nga mahimong makakuha sa mas barato nga tanyag, mahimo pang makasuroy, bakasyon nga libre.

Kini kay gilusad na sa Bohol ang Balik sa Bohol Online Sale, usa ka pamaligya sa mga pagsuroy ug lulinghayaw sa Bohol nga mitanyag sa halos 70 porsyento sa kaltas sa regular nga presyo sa mga katulganan, suroyanan ug mga serbisyo pag-alagad sa turista.

Pamaligya nga giapilan sa 13 ka mga hotels ug accommodation establishments, usa ka adventure park ug 6 ka mga travel ug tour operators nga mga taga Bohol ug gisuportahan sa Department of Tourism, Tourism Promotions Board, DOT 7, Cebu Pacific ug mga local nga ahensya sa kagamhanan, ang Balik sa Bohol Online Sale gitumong aron mas padaghanon pa ang mga turista nga mobalik aron usab ang paghandum sa kasinati-an sa pagsuroy sa Bohol.

Segun pa ni Bohol Tourism Officer Josephine Cabarrus, 80 sa usa ka gatus ka turista sa Bohol, mga namalik na nga mga manuroyan kay tataw nga wala gyud matagbaw sa ilang una nga kasinati-an dinhi.

Subay niini, gibutyag sa BTO nga tumong nila karon nga aghaton ang mga buot mamalik dinhi apan nangita usab sa kasegurohan nga dili sila matakdan sa sakit.

Ang Balik sa Bohol Online sale giapilan sa Amarela, Amorita, Be Grand Hotel, Bellevue, Ivy Wall Best Western Plus, Bluewater Pangalo, Bee Farm, Bohol Beach Club. Chocolate Hills Adventure park, Acacia Glamping, Donatela, Lobo Rover Resort, South Palms, Mithi, ug Modala.

Sa mga tour operators, lakip niini ang Angels Wings, Baclayon Travels and Tours, Coordinates Travel, Dagohoy Travel and Tours, Travel Village ug Bohol Holidays Travel and Tours.

Gawas sa gipasangil nga mahal ang Bohol nga suroyan ug misamot ka mahal tungod sa estrikto nga pagpatuman sa mga lakang batok sa coronavirus disease, ang Balik sa Bohol Online Sale buot nga mopamatuod nga barato, luwas ug gipasalig nga mas nindot pa nga suroyan ang Bohol karon nga limitado na ang dawaton sa mga resorts ug hotels.

Gibaligya alang sa tanan, bisan ngadto sa mga taga Bohol nga buot makasuway sa mga kasinati-an sa pagkaturista dinhi, ang Balik sa Bohol Online Sale makit-an sa www.traveloco/ph/balikbohol ug kinahanglan nga didto makompleto ang pagbayad sa suroyan pinaagi sa online facility.

Gani, segun pa sa mga tigpasiugda sa nahisgutan nga tour ug travel promotions, mahimo pa nga ang mga swertehon nga mga Bol-anon makadaug og 3 ka adlaw ug duha ka gabii nga pagpuyo nga libre sa usa ka hotel o resort, libre nga balikan sa ticket sa eroplano ug uban pang makadani nga mga pahalipay.

Alang sa mga taga Bohol, gikinahanglan lamang nga mopalit sa serbisyo nga gitanyag, may ikapakita nga voucher sa napalit nga puy-nan ug mamahimo nga makadaug.

Ang Balik sa Bohol Online Sale usa ka lakang sa pag-aghat sa mga Pilipino nga gilaayan na sa pagkatanggong sa ilang mga panimalay, nga gasahan ang ilang kaugalingon sa pagsuroy sa Bohol diin ang mga mosubay sa mga nindot nga talan-awon pinaagi sa tourism bubble gipaneguro nga dili masagolan og lain alang usab sa mas luwas nga paglulinghayaw. (rahc/PIA-7/Bohol)

MAS HAPSAY, MAS HAYAHAY. Kon kaniadto ang tour Bohol nasamok sa nagsugwak nga mga tawo, lahi na karon kay gipatuman na ang carrying capacity sa mga lugar mao nga mapaabut na ang mas halugaway ug mas pribado nga mga lugar sa Panglao, Dauis ug Anda. (rahc/PIA-7/Bohol)

BALIK SA BOHOL SALE. Nindot ra kaayo nga palabyon sa mga Bol-anon ang kahigayunan nga kita na una ang makapahimulos sa mas gipanindot ug gipamaayo nga pagsuroy sa Bohol sa presyo nga 70 porsyento ang kaltas, sa pasiunang pangaghat niining paningkamot nga bangonon ang turismo sa panahon sa pandemya, saysay ni Josephine Cabarrus ug Joanne Pinat sa Bohol Tourism Office. (PIA Bohol)