Ayaw sipyata ang libreng imunisasyon:

I-apil sa libre’ng pamakuna ang

mga bata karon nga Abril 24-30

TAGBILARAN CITY, Bohol, (PIA)—Subay sa World Immunization Week nga magsugod Abril 24-30, gipahinumdom sa National Immunization Program (NIP) Coordinator ngadto sa mga ginikanan sa mga kabataan nga nag edad og usa ngadto sa 23 ka buwan sa pagpabakuna sa mga bata samtang libre pa ang bakuna.

Si Macchiavellia Luida Caliao, nurse sa Provincial Health Office ug NIP Coordinator , mibutyag nga ang Bohol nakighiusa sa Department of Health ug sa World Health Organization sa pagkampanya sa pagpataas pa sa kadaghanon sa mga tawo nga mabakunahan aron mapanalipdan sa mga sakit nga pwede ra nga panalipdan sa bakuna.

Ug sanglit subay sa lagda sa DOH nga wala nay bata nga ipanganak gawas sa mga birthing centers, rural health centers ug lying-in clinics ug hospitals, gidason ni Caliao nga angayan lamang nga makakuha na kini og bakuna sa dili pa makagawas sa giangkan.

Gipasabut ni Caliao nga ang unang bakuna nga ihatag sulod sa 24 oras sa pangkahimugso mao ang una nga tupok sa bakuna batok sa Hepatitis B, ug ang Respiratory Syncytial Viru (RSV) antibody kon ang inahan wala mabakunahi sa RSV samtang nagsabak, ug kon ang bata, gipanganak sa panahon nga ting-uso sa RSV.

Ang RSV o orthopneumovirus, usa ka matang sa virus nga hinungdan sa impeksyon sa ginhawaan ngadto na sa baga.

Hatagan na usab sa ikaduhang tupokan sa Hepatitis B ang bata kon kini anaa na sa 1-2 ka buwan na ug sa ikatulo nga tupokan sa ika 8-16 ka buwan na ang edad.

Gitataw usab sa Provincial Health Office nga ang bakuna makuha nga libre sa mga ospital ug mga birthing centers.

Dinhi sa Pilipinas, alang sa mga bata nga 0-23 ka buwan ang pangedaron, kinahanglang makakompleto sila sa mosunod nga bakuna: Oral Polio Vaccines nga ihatag sa bata nga 1 ug tunga sa buwan sa unang patak, duha ug tunga ka buwan ang ikaduhang patak ug sa ika tulo ug tunga sa buwan sa ikatulong patak.

Importante usab nga makuha sa bata ang Pneumococcal (PCV) nga maoy manalipod batol sa pneumococcal disease, lakip na ang impeksyon sa dunggan ug mismong pneumonia.

Libre na usab ang pentavaccines: ang lima ka sakit nga tubagon sa usa lamang ka tupkan, dugang niya.

Ang pentavalent vaccines, o penta vaccines, maghatag panalipod sa bata batok sa Diphtheria, Tetanus, Pertussis (whooping cough), Hepatitis B, ug Hib (Haemophilus influenzae type b).

Kining mga bakunaha, kasagaran ihatag sa bata sugod usa ka buwan ug tunga, aron mas mapalig-on pa ng immunity sa bata batok sa sakit. (PIABohol)