PCC, may solusyon sa

Nagkanihit nga kabaw

TAGBILARAN CITY, Bohol (PIA)—Mas daghang giihaw kon itandi sa gipanganak, hinay nga pagkawala sa uso nga kabaw ang idaro ug ang pagbaligya sa kabaw isip dinali-ang alkansya kon magkalisud, maoy hinungdan sa nagkanihit nga kadaghanon sa kabaw sa Bohol.

Kini maoy namatikdan sa Philippine Carabao Center (PCC) sa Ubay Stock Farm (USF) nga nakaapekto sa produksyon sa kabaw dinhi, subay usab sa taho sa Philippine Statistics Authority (PSA).

Gikataho sa PSA nga sa 2024, may namatikdan nga -6.6 percent nga pagkunhod sa produksyon sa kabaw.

GIkan sa 2,704.91 metriko toneladas sa 2023, mikunhod kini ngadto na sa 2,520.88 metriko toneladas sa 2024, segun sa taho sa PSA.

“Bisan kon wala kita’y kompleto nga imbentaryo sa mga kabaw sa Bohol kay nagsalig kita sa mga datus gikan sa Office of the Provincial Veterinarian (OPV) ug sa Philippine Statistics Authority (PSA)—namatikdan nato nga ang populasyon sa kabaw nagsige og kunhod ang populasyon sukad pa niadtong 2017, matud ni PCC-USF Leinefe Libres Aton.

Subay sa mga datus sa PCC, namatikdan nila ang perming ihaw sa mga kabaw, ug subay niini, gipatugway sa PCC-USF ang produksyon sa genetically improved dairy-type nga mga nati sa kabaw, taho ni Aton.

Sa pagkawala sa uso sa kabaw nga pangdaro, matud sa PCC nga ang ilang kampanya karon, nagtutok na usab sa pagpanggatas sa mga kabaw isip dugnag tinubdan sa kapanginabuhi-an.

Ang gatas sa kabaw karon, mapalit na sa tag P70 ang litro, ug ang usa ka kabaw, makahatag ug duha ngadto sa unom ka litro matag adlaw nga gatas, butyag ni Aida Sumampong, hepe sa Livestock department sa OPV.

Usab, sa mga mag-uuma, ang kabaw maoy gihimo nga tigum, ug kini dayon ang madali-dali sa pag-ihaw o pagbaligya kon may dinali-an nga panginahanglan sa kwarta.

Niini usab, ang PCC mipadayag nga apil sa mga Strategic Interventions sa PCC mao ang pagpadaghan sa genetically improved dairy type nga mga kabaw, pagsagop sa gipamaayo pa nga pagdumala sa mga teknolohiya sa pagpasanay sa mga kabaw u gang paggamit sa nga pinili nga mga binhi aron mas modaghan ang nati nga mahimong gatasan kay sa mahimong toro.

Pinaagi niini, gilantaw sa PCC nga mas daghan na nga mga mamahimong gatasan sa 2027, nga makapalig-on sap anon s amga kabaw ug magpadaghan pag samot sa gatas nga makuha sa Bohol alang sa iyang matag adlaw nga programa sa nutrisyon, matud ni Aton. (PIABohol)

GATAS SA KABAW. Matud ni Aida Sumampong, hepe sa Livestock Division sa OPV, gipakadak-an na karon ang paggatas sa mga kabaw, isip tinubdan sa dugang kapanginabuhi-an sa mga Bol-anon, aron usab sa pagmadaghan og balik sa mga kabaw nga dili na tig-gamit sa mga darohan tungod sa mechanization. (PIABohol)