Sa kasaulogan sa ika-62 nga anibersaryo sa NIA-7:

grocery package ihatag alang sa modonar og dugo

TAGBILARAN CITY, Bohol (PIA)--Sa pagsaulog sa ika-62 nga anibersaryo sa pagkatukod niini, ang National Irrigation Administration (NIA) Region VII gitakdang mopahigayon og Bloodletting Activity karong Hunyo 9, 2025 gikan alas 9 sa buntag taman alas 3 sa hapon sa NIA R7 CVTC Function Hall sa Barangay Dao, ning syudad sa Tagbilaran.

Ang bloodletting drive bukas sa publiko, mga empleyado o dili mga empleyado, mga estudyante, ug mga miyembro sa komunidad nga nag-edad 18 anyos pataas nga andam ug angayan nga modonar.

Kining kalihokan gihimo uban sa pakigtambayayong sa Philippine Red Cross – Bohol Chapter ug nagtumong sa pagtabang sa pagtubag sa kritikal nga panginahanglan sa dugo sa mga lokal nga ospital ug pasilidad sa panglawas sa probinsiya.

Tungod kay ang ahensya nagsaulog sa 62 ka tuig sa pagserbisyo, ang unang 62 ka malampuson nga mga donor makadawat og grocery package gikan sa NIA Region VII isip timaan sa pasalamat.

Matud pa ni NIA Region VII Regional Manager Engr. Antonio B. Gujeling, kini nga kalihokan maoy ilang paagi sa paghatag og balik sa komunidad samtang nagsaulog sa kabilin sa serbisyo sa NIA.

Tungod niini, gidapit ni Gujeling ang tanan nga mahimong kabahin niining makaluwas sa kinabuhi nga inisyatibo diin ang usa ka donasyon makahimo og dakong kalainan.

Bukas ang buhatan sa mga walk-in donors, apan ang mga partisipante gi-awhag nga magparehistro daan aron matabangan ang mga organizer sa pag-andam ug pagsiguro sa hapsay nga dagan sa panahon sa maong kalihokan.

Ang NIA nagpadayon sa pag-alagad sa katawhang Pilipino pinaagi sa dili lamang pagpalambo sa mga sistema sa irigasyon apan pinaagi usab sa pagpasiugda sa panglawas sa publiko ug sosyal nga responsibilidad.

Alang sa dugang impormasyon, mahimong motawag sa 09301575842 ni Ms. Gretchen Hilot- Nurse I). (ECB/PIA7-Bohol)

Isip pagsaulog sa ahensya sa 62 ka tuig nga pagserbisyo, ang unang 62 ka malampuson nga mga donor makadawat og grocery package gikan sa NIA Region VII isip timaan sa pasalamat sa Hunyo 9, 2025 gikan alas 9 sa buntag taman alas 3 sa hapon sa NIA R7 CVTC Function Hall sa Barangay Dao, ning syudad sa Tagbilaran. (NIA/PIA)