Tambok, sobra-an sa timbang:

Lain’g matang sa malnutrisyon

TAGBILARAN CITY, Bohol (PIA)—Gawas sa pagka-putot ug pagka-wangkig, suliran usab sa malnutrisyon ang sobra ka tambok.

Kini maoy gipasabut sa mga nutritionists ug dieticians nga mitambong sa Kapihan sa PIA, alang sa pagpadayag sa mga kalihukan sa buwan sa nutrisyon.

Nahimo na nga suliran sa tibuok kalibutan ang sobra ka tambok, din ang lawas nagtigum sa sobra ka daghan sa mantika, nga usa sa mga kina-ingnan sa mga suliran sa kahimsug sa lawas apil na niini ang mga sakit sa kasingkasing, diabetes, suliran sa bukog ug kaunoran ug mga matang sa kanser, pasabut sa mga nutritionists nga sila Arden Abrea ug Glenda Grafilo.

Ang pagka tambok ug subra sa timbang sa edad ug katas-on sa bata, kasagaran tungod sa gikaon niini, matud pa sa mga doctor.

Ang pagkaon nga sobrasobra sa calories, mantikaon, softdrinks, labi na kon aydaan sa mga prutas, utanon, ug kadtong mga linsok nga wala pa magaling.

Idugang na usab ang kakuwang sa pasingoy, kay kon dili magamit ang gikaon nga calories, mas makapaluya ug dili na layhan pang molihok, dugang sa mga nagtuon niini.

Ang palibot sama sa panimlaya usab sa bata, dako og ikatampo sa suliran, sama sa kon dunay maabut nga mga maayong pagkaon alangs a kahimsog, igo nga lugar nga ikapasingot u gang pagdili sa mga ginikanans a pagpalit sa mga dili maayong pagkaon, sagad kina-ingnan sa suliran.

Usa na usab ang kaliwat, kay kon ang bata may kaliwat nga tambok, kasagaran igo lang usab sila mosundog sa kinaiya, gikaon ug batasan sa pagpangita sa dili himsog nga pagkaon.

Dinhi sa Bohol, subay sa labing bag-o nga datus sa Operation Timbang Plus nga gihimo sa mga tinugyanan sa Department of Health, Provincial Health Office ug sa Provincial Nutrition Council, nagpakita nga ag Loay, San Isidro, Tagbilaran City ug Ubay ang adunay labing daghang kabataan nga natimbang ug nahibaw-an nga tambok.

Hinuon, sa kadaghanon kon itandi sa kinatibuk-ang kadaghanon sa mga kabataan sa us aka lugar, ang Antequera din may 4.92 porsyento sa ilang kabataan ang tambok, maoy nanguna.

Kini gisundan sa Baclayon (4.49%), Sevilla (4.09%), Jagna (3.94%), Clarin (3.65%), Guindulman (3.50%), Lila (3.43%), Sagbayan (3.30), Cortes (3.15) ug Alburquerque ang nahasulod sa 10 ka lungsod nga may daghang kabataan nga tambok. (PIABohol)