Inflation sa Julyo mas ubos: 1.3%

kon itandi sa 1.5% sa Hunyo ‘25

TAGBILARAN CITY, Bohol (PIA)—Nagpadayon ang pag-ubos sa inflation rate sa Bohol sa buwan sa Julyo, diha nga gikan sa 1.5 percent niadtong Hunyo, mas mihinay pa kini ngadto sa 1.3 percent.

Subay sa gitaho ni Chief Statistical Specialist Jessamyne Anne Alcazaren sa Philippine Statistics Authority sa Bohol, ang maayong kinaiya sa inflation nga nagsige na og panaug, namatikdan sukad pa niadtong Marso, o lima na ka buwan nga nagpadayon sa iyang pag-ubos.

Ang mga hinungdan sa paghinay sa inflation rate, mao ang pagkaon ug ang ilimnon nga dili makahubog (gikan sa -2.0 sa Hunto ngadto na sa -2.7 percent sa Julyo), edukasyon ug personal care and miscellaneous services (gikan sa 1.8 sa Hunto ngadto na sa 1.1 percent sa Julyo).

Ang mas napahinay nga inflation niresulta bisan pa gani sa pagki-at sa presyo sa ubang mga imporante nga paliton sama sa aktwal nga abangan sa mga balay ug sak-anan, isda ug uban pang mga pagkaon sa dagat, karne ug nga parte sa giihaw nga mananap, gatas ug mga produkto gikan niini apil na ang itlog, ug ang pletehan sa mga sakyanan sa dagat ug sa mga katubigan.

Hinuon, dili kaayo gara ang presyo, sa mga pagkaon, hinungdan nga ang food inflation sa Bohol, anaa ra sa -3.0 percent.

Ang mas ubos nga inflation sa karne ug ubang mga parte sa mananap nga giihaw gikan sa 11.5 ngadto na sa 9.0 percent, giparesan sa mas paspas nga negative inflation sa bugas humay (-16.3 % ngadto sa -17.5% sa Julyo), mga niluto na nga pagkaon (-0.9% ngadto sa -1.6%) ug mga utanon, lagutmon, saging ug mga batong (-10.3 ngadto na sa 110.4%), hinungdan sa mas maayong kinaiya sa dagan sa presyo niining tuiga. (PIABohol)

PISO KATUMBAS SA .80. GIkan sa sukaranan nga tuig 2018, ang piso kaniadto, katumbas na lamang sa P0.80 sentavos, apan hinuon, kini mas maayo na kay sa 0.70 nga natala sa unang tulo ka buwan sa tuig, taho ni Jessamyne Anne Alcazaren, ang chief statistical specialist sa PSA Bohol. (PIABohol)