SA IT-BPM, unta wala nay Bol-anong

Mogawas, aron mangita og trabaho

TAGBILARAN CITY, Bohol (PIA)—Gilantaw sa opisyal sa Bohol Information Communication Technology Council (BICTC), kinsa nagtutok sa pagdumala sa industriya sa Business Process Management (BPM) dinhi nga moabut na ang panahon nga wala nay Bol-anon nga molangyaw pa aron mangitag kapanginabuhian, kay anina na dinhi ang daghang kapanarbahoan.

Didto sa Kapihan sa PIA, si Jay Paul Aying, Presidente sa BICTC, mibutyag nga kalakip na sa ilang panganday alang sa Bohol ang pagpabukas sa mas daghang kapanarbahoan dini aron wala nay Bol-anon pa nga mogawas aron manimpad, wala nay banay nga mabuwag tungod sa trabaho ug mapaundang na ang panaglagyoay sa banay.

Si Aying kinsa usa usab ka web developer ug start-up founder, mipadayag nga sa Information Technology nga gipasugdan na dinhi sa Bohol, may maayong kaugmaon.

Human sa pipila lamang ka katuigan sa pagtukod sa BICTC, napaengganyo na sa Bohol ang upat ka dagkong kompanya sa business process management (BPM) nga kasamtangan nga nagpasweldo sa kapin na sa 5,000 ka mga Bol-anon.

Sa IT-BPM, anaa nag contact center ug serbisyo sa business process, healthcare information management, global capability center, animation, IT ug software ug game development, nga ang Bohol adunay daku nga potensyal.

Daku ang bentaha sa Bohol sa mga trabahante tungod sa daghan nga mga graduates dini sa usa ka state college, 14 ka mga pribadong colleges ug universities, ug 10 ka mga municipal colleges nga may mga batan-ong graduates nga hanas sa pagsulti ug pagsabut sa Inengles, daghang gradwado sa mga medical courses nga makatabang sa call center operations, taho ni Bohol Economic Development and Investment Promotions Officer Maria Fe Dominese.

Bag-o lamang usab ang Bohol gihatagan sa maayo nga rating gikan sa IT BPM Association of the Philippines (IBPAP).

Matud ni Lack Madrid, presidente ug CEO sa IBPAP nga ang Bohol dili lamang emerging site, apan nakagitib na ngadtp sa usa ka scalable and talent-ready IT BPM hub.”

Niini, gipaningkamotan sa BICTC nga makasakay niini ang mga Bol-anon nga nangita pa og kapanarbahoan, ilabi na kadtong mga batan-ong graduates.

Gawas sa kapanarbahoan nga ania lamang dinhi, gidamgo usab sa presidente sa BICTC, nga us aka adlaw pohon, mas daghan na nga mga taga Bohol ang makabaton sa katakus, dili lamang sa business process and outsourcing services apan sa mas kasaligang sector sa global capability center, animation, IT ug software ug game development.

Tungod niini, gipaspasan sa konseho sa Bohol ang paghimo sa Bohol ICT Road map. (PIABohol)

HAYAG NGA PANGLANTAW. Gipadayag ni Jay Paul Aying, Presidente sa BICTC ang panglantaw nga unta moabut na ang panahon nga wala nay Bol-anon nga mobiya sa Bohol aron mangitag kapanarbahoan sa gawas. Sa IT BPM, dayag na lang nga mas daku ang sweldo ug mas may nindot nga sitwasyon ang napahimutang sa Bohol, ug kon modaghan ang mga locators, seguradong may trabaho. (PIABohol)